Níu þúsundasti íbúinn í Árborg kemur í janúar

Bráðabirgðatölur sýna að íbúar í Árborg hafi verið 8.998 í sveitarfélaginu hinn 1. janúar 2018. Það er því bara dagaspursmál hvenær sveitarfélagið nær 9.000 íbúa markinu. „Það mun gerast á fyrstu dögum janúar ef að líkum lætur. Meðalfjölgun á mánuði allt síðasta ár hjá okkur var um 43-45 manns,“ segir Ásta Stefánsdóttir bæjarstjóri.

Íbúum í Árborg fjölgaði um 523 á nýliðnu ári miðað við fyrstu tölur eða 6,17%. Fjölgað hefur í öllum byggðakjörnunum og í dreifbýlinu. Á Selfossi fjölgar mest, eða um 423, og á Stokkseyri um 49. Ásta á von á því að fjölgunin haldi áfram 2018. „Já, ég á von á því að það muni eitthvað halda áfram að fjölga á næsta ári, jafnvel þó að eitthvað kunni að hægja á. Það er mikið af húsnæði í byggingu hér enn þá og margar íbúðir munu koma á markaðinn á árinu 2018“, segir Ásta.

Ásta segir mjög ánægjulegt að svona margir skuli velja Sveitarfélagið Árborg sem stað til að búa á enda standist þjónustan allan samanburð á landsvísu.

„Það er líka ánægjulegt að það skuli fjölga fólki alls staðar í sveitarfélaginu. Mörg lítil þorp eru í varnarbaráttu og glíma við fækkun íbúa, en á Eyrarbakka og Stokkseyri fjölgar fólki. Einnig virðast margir telja það góðan kost að búa í dreifbýlinu,“ segir bæjarstjórinn í Árborg.