Ekkert gengur hjá Lakers

Tíu leikir voru spilaðir í NBA- deildinni í nótt. Vandræði L.A. Lakers héldu áfram þegar að liðið tapaði á heimavelli gegn Charlotte Hornets, 108-94.

Var þetta níundi tapleikur Lakers í röð sem situr á botni vesturdeildar NBA með aðeins 11 unna leiki af 38 spiluðum.

Stuðningsmenn Lakers púuðu á liðið þegar það gekk af velli og hafa þeir greinilega fengið nóg af spilamennsku liðsins á tímabilinu. Þeir gátu hins vegar fagnað endurkomu Lonzo Ball, sem spilaði nokkrar mínútur í fyrsta leik sínum fyrir liðið síðan 23. desember. Hafði hann fyrir leikinn í nótt misst af sex leikjum vegna axlarmeiðsla.

Hornets hafa unnið þrjá af síðustu fjórum leikjum sínum, þar á meðal unnu þeir óvæntan sigur á meisturum Golden State Warriors fyrr í vikunni.

Efsta lið austurdeildar, Boston Celtics, vann torsóttan sigur á heimavelli gegn Minnesota Timberwolves, 91-84. Lið Celtics hitti aðeins úr 38 af 94 skotum sínum í nótt, þar af úr 6 af 36 þriggja stiga skotum.

Það kom hins vegar ekki að sök og skóp frábær varnarleikur þeirra sigurinn. Marcus Smart kom af bekknum og var stigahæstur í liði Celtics með 18 stig.

Miðherjinn stæðilegi, Karl-Anthony Towns fór hins vegar fyrir gestunum frá Minnesota, skoraði 25 stig og tók 23 fráköst sem er persónulegt met hjá honum.

Öll úrslit:

L.A. Lakers - Charlotte Hornets: 94-108

Boston Celtics - Minnesota Timbervolwes: 91-84

Philadelphia 76ers - Detroit Pistons: 114-78

Miami Heat - New York Knicks: 107-103 (Framlengdur leikur)

Milwaukee Bucks - Toronto Raptors: 110-129

Dallas Mavericks - Chicago Bulls: 124-127

San Antonio Spurs - Phoenix Suns: 103-89

Denver Nuggets - Utah Jazz: 99-91

Memphis Grizzlies - Washington Wizards: 100-102

Portland Trailblaizers - Atlanta Hawks: 110-89