Oprah Winfrey stal senunni á Golden Globe með tilfinningaþrunginni ræðu

Bandaríski þáttastjórnandinn og leikkonan Oprah Winfrey varð í nótt fyrsta svarta konan til að hljóta Cecil B. DeMille-verðlaunin á Golden Globe-hátíðinni en um er að ræða heiðursverðlaun hátíðarinnar.

Ræða hennar var tilfinningaþrungin og, eins og búast mátti við, var innblásin af MeToo-byltingunni sem hófst með frásögnum kvenna sem starfað hafa í Hollywood af kynferðisofbeldi og áreitni kvikmyndaframleiðandans Harvey Weinstein.

Winfrey byrjaði þó ræðuna á því að lýsa upplifun sinni af því þegar Sidney Poitier varð fyrsti svarti maðurinn til þess að fá Óskarsverðlaun árið 1964. Sagði Winfrey að hún hefði aldrei áður séð svörtum manni fagnað með þessum hætti.

„Og nú kemur það í minn hlut að litlar stelpur horfa á mig þar sem ég fæ þessi verðlaun sem fyrsta svarta konan,“ sagði Winfrey.

Hún kvaðst síðan vera stolt og full innblástrar vegna allra þeirra kvenna sem stigið hafa fram og sagt frá kynferðislegu ofbeldi og áreitni sem þær hafa orðið fyrir.

„Mig langar til að þakka öllum konunum sem hafa árum saman þurft að þola misnotkun og ofbeldi því þær, eins og mamma mín, þurftu að gefa börnunum að borða, borga reikningana og elta drauma sína. Þær eru konurnar sem við munum aldrei vita deili á,“ sagði Winfrey.

Winfrey rifjaði síðan upp sögu Recy Taylor sem var ung, svört kona í Abbeville, Alabama árið 1944. Þar sem hún var á leið heim úr kirkju réðust sex hvítir menn á hana, tóku hana höndum og nauðguðu henni. Þeir skildu síðan eftir út í vegkanti með bundið fyrir augun. Þeir hótuðu að drepa Taylor ef hún segði frá.

Það er skemmst frá því að segja að brot þeirra gegn Recy Taylor hafði engar afleiðingar fyrir þá; þeir komust upp með hópnauðgun en baráttukonan Rosa Parks aðstoðaði Taylor við að ná fram réttlæti í málinu, án árangurs.

What a night for @Oprah! We caught up with her backstage to talk about her Cecil B. de Mille acceptance speech tonight. #GoldenGlobes pic.twitter.com/GgZmSFnw0B

— Golden Globe Awards (@goldenglobes) January 8, 2018

„Í of langan tíma hefur konum hvorki verið trúað né á þær hlustað“

Recy Taylor lést fyrir 10 dögum, 97 ára að aldri. Winfrey sagði hana lifað eins og allar aðrar konur; í menningu sem er brotin vegna hrikalega valdamikilla manna.

 „Í of langan tíma hefur konum hvorki verið trúað né á þær hlustað ef þær hafa dirfst til að segja sannleikann gegn valdi þessara manna. En tími þeirra er kominn!“ sagði Oprah og uppskar dúndrandi lófaklapp úr salnum.

Hún endaði ræðu sína svo á þessum orðum:

„Ég vil að allar stelpurnar sem eru að horfa núna viti að ný dögun er á sjóndeildarhringnum og að þegar sá nýi dagur rennur loksins upp þá verður það út af mörgum mögnuðum konum sem margar eru hér í kvöld og út af stórkostlegum mönnum sem berjast af öllu afli til þess að þær verði leiðtogarnir sem leiða okkur inn í þann tíma þar sem enginn þarf að segja „MeToo.““

Ræðu Winfrey má sjá í heild sinni í spilaranum hér fyrir neðan.