Halldóra Mogensen stýrir velferðarnefnd

Halldóra Mogensen, þingmaður Pírata, verður formaður velferðarnefndar Alþingis fyrri helming kjörtímabilsins. Seinni helming kjörtímabilsins mun þingmaður Samfylkingar stýra nefndinni en þá taka Píratar við formennsku í stjórnskipunar- og eftirlitsnefnd. Í tilkynningu frá Pírötum segir að um sé að ræða samkomulag Pírata og Samfylkingar sem hafa ákveðið að skipta á milli sín formennsku í nefndunum tveimur á kjörtímabilinu.

Halldóra sat í velferðarnefnd á síðasta kjörtímabili, eftir alþingiskosningarnar í fyrra. Þá átti hún einnig sæti í Íslandsdeild Alþjóðaþingmannasambandsins og Íslandsdeild þings Öryggis- og samvinnustofnunar Evrópu.

Hún tók fyrst sæti á Alþingi árið 2014 sem varaþingmaður Helga Hrafns Gunnarssonar. Halldóra hefur einnig setið í framkvæmdaráði Pírata og tók þátt í stofnun flokksins.