Góð samvera besta jólagjöfin

Jólin byrjuðu snemma á æskuheimili Hreindísar í Mosfellsdal. „Þar er ekki götulýsing sem er kjörin afsökun til að setja jólaljósin upp í nóvember. Og í byrjun desember er allt jólaskrautið komið upp nema tréð sem fer upp á Þorláksmessu.“

Þegar Hreindís varð eldri fékk hún vinnu í bókabúð og jólabókaflóðið varð ómissandi hluti af jólastemmingunni. 

„Ég komst á tímabili ekki í jólaskap fyrr en ég var komin í Eymundsson að selja bækur. Meira að segja þegar ég var í námi í útlöndum tók ég vaktir í jólafríinu til að ná jólabókaflóðinu.“ Jólaskapið á fleiri bandamenn í lífi Hreindísar og hún viðurkennir að jólatónlistin kveiki líka í því. Þó sérstaklega eitt jólalag. 

„Þegar ég var yngri þá þoldi ég ekki jólalagið Ef ég nenni. Einhver sagði þá við mig: Bíddu bara, þú átt eftir að fatta þetta lag þegar þú eldist. Fyrir svona fjórum árum, þegar ég var 24 ára, kom Helgi Björns allt í einu með jólin til mín og nú kemur þetta lag mér alltaf í jólaskap.“

Malt og appelsín og mandarínur koma líka með jólin. „Einu sinni var malt og appelsín bara í boði á jólunum en nú er ég byrjuð að drekka það. Frá 1. nóvember er allt leyfilegt í jólamálum. Og svo mandarínur! Ég sporðrenni fáránlegu magni af mandarínum á þessum árstíma og er búin að klára fyrsta kassann.“

Hreindís viðurkennir að sér finnist gaman að kaupa jólagjafir en hefur þó upp á síðkastið snúið frá hefðbundnum pökkum. 

„Ég er farin að hallast að því að gefa frekar upplifun eða samveru. Taka frá eitt kvöld og fara saman í leikhús eða út að borða, vera saman. Mér finnst mjög gaman að kaupa jólagjafir en núna er besta jólagjöfin tími.“

Þegar talið berst að jólafötum á Hreindís sér uppáhald. „Ég á mjög ljóta jólapeysu. Hún er með jólaljósum! Við bróðir minn erum náin og fengum sína peysuna hvort í jólagjöf. Við eigum sem sagt jólapeysur í stíl. Þær eru þægilegar, þykkar og kósí og mjööög jólalegar og koma mér alltaf í jólaskap.“ Það er því fjölmargt sem færir jólabarninu Hreindísi Ylfu jólin.