Keflvíkingar ekki lengi að redda landsliðskonu fyrir Emelíu

Embla Kristínardóttir hefur gert samning við Keflavík og mun spila með Íslands- og bikarmeisturum það sem eftir lifir tímabilsins. Sverrir Þór Sverrisson staðfestir þetta í samtali við Víkurfréttir.

Embla hefur spilað með Grindavík síðustu ár en rifti samningi sínum á dögunum eftir ósætti á milli hennar og spilandi þjálfara Grindavíkurliðsins, Angelu Rodriguez.

Embla hefur verið í íslenska landsliðinu fram að nýjasta verkefni þess en hún hefur farið á kostum með Grindavík í 1. deildinni þar sem hún var með 21,3 stig, 12,4 fráköst og 5,0 stoðsendingar að meðaltali í leik.

Hún var efst í stigum, stoðsendingum, stolnum boltum og framlagi í 1. deildinni auk þess að vera í 2. sæti í stoðsendingum.

Embla er uppalinn hjá Keflavík og er því komin aftur heim en lék síðast með liðnu 2014-15 tímabilið. Embla varð Íslandsmeistari með Keflavík vorið 2013.

Þetta eru mjög góðar fréttir fyrir Keflavík sem missti landsliðskonuna Emelíu Ósk Gunnarsdóttur í vikunni. Emelía sleit krossband í leik á móti Skallagrími í Borgarnesi á miðvikudagskvöldið. Keflvíkingar voru því ekki lengi að redda annarri íslenskri landsliðskonu fyrir Emelíu.