Veðrið mun versna eftir því sem líður á daginn

Norðanáhlaupið sem gengur yfir landið þessa stundina nær hámarki síðar í dag og gengur svo niður á morgun, að sögn veðurfræðings á Veðurstofu Íslands.

Í dag er búist við norðan 13 til 18 metrum á sekúndu, annars 20 -2 28 metrum, hvassast austast á landinu. Snjókoma og skafrenningur norðan- og austanlands, annars yfirleitt úrkomulaust. Fremur hæg norðlæg átt og léttskýjað vestan til á morgun. Norðvestan 15-23 og él á austanverðu landinu, en dregur smám saman úr vindi og úrkomu síðdegis.

Frost 0 til 5 stig, en kólnar meira seinnipartinn á morgun.

Davíð Már Bjarnason, upplýsingafulltrúi slysavarnafélagsins Landsbjargar, segir í samtali við Vísi að björgunarsveitarfólk sé í viðbragðsstöðu og búið undir útköll þar sem þeim gæti fjölgað eftir því sem veður versnar þegar líður á daginn.

Á vef Vegagerðarinnar er að finna upplýsingar um færð og aðstæður á vegum landsins. Mosfellsheiði og Lyngdalsheiði eru lokaðar. - Holtavörðuheiði er enn lokuð.

Lokað er um Siglufjarðarveg, Ólafsfjarðarmúla, Öxnadalsheiði, Víkurskarð og Hófaskarð. Mývatns og Möðrudalsöræfi eru einnig lokuð - sem og Fagridalur og Fjarðarheiði.Nokkur hálka er víða á Suðurlandi en sums staðar hvasst. Vegur er lokaður vestan Laugarvatns , allt vestur á Mosfellsheiði.

Á Vesturlandi er víðast hálka eða snjóþekja en Holtavörðuheiði er enn lokuð. Næst verður staðan tekin þar núna um hádegið.

Á Vestfjörðum er búið að stinga í gegn á Klettshálsi. Búið er að opna Súðavíkurhlíð og mokstur er hafinn í Djúpinu.

Hálka eða snjóþekja er á aðalleiðum á Norðurlandi vestra en víða þyngri færð á sveitavegum. Siglufjarðarvegur er lokaður.

Hríðarveður er á Norðurlandi eystra, vegir víða þungfærir eða ófærir. Lokað er á Öxnadalsheiði, í Ólafsfjarðarmúla og á Víkurskarði. Eins er lokað á Hófaskarði og síðan er lokað yfir Fjöllin frá Mývatni og austur um.

Lokað er bæði á Fjarðarheiði Fagradal vegna veðurs. Víðast er fært á Héraði en Vatnsskarð eystra er ófært.

Vegur er opinn með austur- og suðausturströndinni en víða er hvasst ekki síst í Hamarsfirði.