Sjálfstæðisflokkurinn á móti öllum breytingum á gjaldtöku í sjávarútvegi

Þorsteinn Pálsson segir að Sjálfstæðisflokkurinn standi í vegi fyrir öllum hugsanlegum breytingum á fyrirkomulagi við fiskveiðar og að aukinn arður renni í samneysluna.

Þetta kemur fram greinargerð hans sem formaður nefndar sem Þorgerður Katrín Gunnarsdóttir sjávarútvegsráðherra skipaði en hún átti að fjalla um framtíðarfyrirkomulag gjaldtöku fyrir afnot af fiskveiðiauðlindinni.

Þorsteinn, sem er fyrrverandi formaður Sjálfstæðisflokksins, forsætis- og sjávarútvegsráðherra, segir nefndina hætta störfum. Tilgangslaust sé að halda áfram starfi hennar, því fulltrúar Sjálfstæðisflokksins standi gegn öllum hugmyndum um breytingar.

Teitur Björn stóð vörð um óbreytt ástand

Ekki er hægt að skilja Þorstein öðruvísi en svo að fulltrúi Sjálfstæðisflokksins í nefndinni, Teitur Björn Einarsson alþingismaður, hafi hreinlega aftrað því að einhver niðurstæða fengist.

„Sjálfstæðisflokkurinn væri ekki á þeirri stundu tilbúinn að fallast á að tímabundinn veiðiréttur skyldi vera grundvöllur gjaldtöku fyrir afnot af fiskveiðiauðlindinni,“ segir meðal annars aðfararorðum greinargerðar sem Þorsteinn hefur skilað til ráðuneytisins.

Ekki hafi tekist að leggja fram tillögur um hvernig tryggja megi sanngjarna gjaldtöku af sjávarauðlindinni.

Allir flokkar nema Sjálfstæðisflokkurinn sammála

Þegar ákveðið var að rjúfa þing og efna til kosninga 28. október næstkomandi stóðu mál þannig, að sögn Þorsteins, að fulltrúar tveggja flokka, Viðreisnar og Framsóknarflokks, höfðu lagt fram tillögur í nefndinni, hvor í sínu lagi.

„Ennfremur höfðu fulltrúar allra flokka, nema Sjálfstæðisflokks, lýst stuðningi við það grundvallarsjónarmið að gjaldtaka skyldi miðast við tímabundin afnot af fiskveiðiauðlindinni.“

Þorsteinn segist hafa gert ráðherra grein fyrir því munnlega að Sjálfstæðisflokkurinn væri ekki tilbúinn að fallast á að tímabundinn veiðiréttur skyldi vera grundvöllur gjaldtöku fyrir afnot af fiskveiðiauðlindinni.

Tilgangslaust að halda starfinu áfram

„Um leið lét ég það álit mitt í ljós að tilgangslítið væri að halda áfram tilraunum til samkomulags um önnur atriði meðan sá flokkur sem fer með forystu fyrir ríkisstjórn opnaði ekki með ótvíræðum hætti fyrir lausn á þeirri forsendu. Þetta mat mitt er óbreytt.“

Þorsteinn segist telja að tímabundinn afnotaréttur sé forsenda fyrir því að ná megi tveimur afar mikilvægum markmiðum í löggjöf um þessi efni: Annars vegar að lagareglurnar endurspegli með alveg ótvíræðum hætti sameign þjóðarinnar. Hins vegar að þær megi stuðla að sem mestri þjóðhagslegri hagkvæmni veiðanna.