Hamas nær samkomulagi við keppinautinn

Hamas-samtökin í Palestínu segjast hafa náð samkomulagi við keppinaut sinn, Fatah-hreyfinguna, en hóparnir hafa átt í deilum í áratug. Frá þessu greindi leiðtogi Hamas og fyrrverandi forsætisráðherrann Ismail Haniyeh í yfirlýsingu nú í morgun.

Hamas stjórna Gaza-svæðinu en Fatah, sem forseti Palestínsku heimastjórnarinnar, Mahmoud Abbas tilheyrir, stjórnar stærsta hluta Vesturbakkans. Ekkert hefur verið greint frá því hvað felist í samkomulaginu en talsmaður Hamas, Sami Abu Zuhri, segir að von sé á yfirlýsingu síðar í dag.

Ekkert hefur hinsvegar heyrst frá liðsmönnum Fatah um málið. Samningaviðræður hafa farið fram undanfarið í Kaíró og hefur heimastjórnin meðal annars krafist þess að taka við stjórninni á Gaza. Hamas-samtökin eru víða skilgreind sem hryðjuverkahópur, meðal annars af Ísraelum, Bandaríkjamönnum, Evrópusambandinu og fleiri ríkjum. Nánar má fræðast um málið á vef Al Jazeera.