Jafntefli hjá Kjartani Henry

Kjartan Henry Finnbogason spilaði allan leikinn fyrir Horsens sem gerði jafntefli við Hobro í dönsku úrvalsdeildinni í knattspyrnu.

Í fyrri hálfleik skoruðu Jonas Thorsen og Bubacarr Sanneh fyrir Horsens og Pål Kirkevold fyrir Hobro. Allt stefndi í sigur Horsens þar til Bjorn Kopplin skoraði jöfnunarmarkið á 89. mínútu.

Hobro varð fyrir áfalli strax á 7. mínútu leiksins þegar Rasmus Minor Petersen fékk að líta beint rautt spjald fyrir brot á Kjartani Henry, en hann var við það að sleppa einn í gegn þegar Petersen braut á honum.

Horsens er í fjórða sæti dönsku deildarinnar eftir jafnteflið, með 20 stig eftir 12 leiki.