Strákarnir fögnuðu gríðarlega í leikslok þegar Marciniak dæmdi síðast hjá Íslandi

Szymon Marciniak, 36 ára Pólverji, mun dæma leikinn mikilvæga á föstudagskvöldið þegar Ísland mætir Tyrklandi í undankeppni HM 2018.

Bæði lið eru að berjast um sæti á heimsmeistaramótinu í Rússlandi og spennustigið verður örugglega mjög hátt í þessum leik. Þá ekki gleyma áreitinu frá hávaðanum í áhorfendum.

Síðasti leikur sem Szymon Marciniak dæmdi hjá Íslandi endaði aftur á móti frábærlega en hann dæmdi leik Íslands og Austurríkis á EM í Frakklandi sumarið 2016.

Íslenska landsliðið vann þá 2-1 á ógleymanlegu sigurmarki Arnór Ingva Traustasonar í uppbótartíma og tryggði sér með því leik á móti Englandi í sextán liða úrslitum keppninnar.  Þetta var einn af þremur leiknum sem Pólverjinn dæmdi í Evrópukeppninni þetta sumar en hinir voru Spánn-Tékkland og Þýskaland-Slóvakía.

Marciniak dæmdi reyndar vítaspyrnu á íslenska liðið í leiknum en hann refstaði þá Ara Frey Skúlasyni fyrir að toga í peysu David Alaba. Aleksandar Dragovic skaut hinsvegar í stöng úr vítinu og íslenska liðið slapp með skrekkinn.

Marciniak gaf íslensku strákunum líka fjögur gul spjöld í leiknum en Austurríkismenn fengu aðeins eitt gult. Marciniak spjaldið þá Hannes Þór Halldórsson, Kára Árnason, Ara Frey Skúlason og Kolbein Sigþórsson.

Aðstoðardómarar Marciniak í leiknum verða þeir Pawel Sokolnicki og Tomasz Listkiewicz.