Óráðið hver tekur við bandinu af Rooney

Gareth Southgate, landsliðsþjálfari Englands, er ekki búinn að ákveða hver verði fyrirliði enska landsliðsins á HM næsta sumar.

Harry Kane verður fyrirliði enska liðsins í kvöld er liðið spilar gegn Slóveníu. Englendingar geta gulltryggt HM-sætið í leiknum.

„Við erum með nokkra menn sem geta tekið þetta hlutverk að sér og það er bara jákvætt,“ sagði Southgate.

Wayne Rooney hefur verið fyrirliði liðsins síðustu ár en hann hefur nú lagt landsliðsskóna á hilluna.

Southgate hefur verið að færa bandið á milli leikmanna síðan hann tók við liðinu. Jordan Henderson hefur verið fyrirliði fjórum sinnum, Kane tvisvar og þeir Gary Cahill og Joe Hart hafa einnig fengið að máta sig með það.