Sebastian Vettel og Lewis Hamilton fljótastir á föstudegi í Japan

Sebastian Vettel á Ferrari var fljótastur á fyrri æfingu dagsins fyrir japanska kappaksturinn í Formúlu 1 sem fram fer um helgina. Lewis Hamilton á Mercedes var fljótastur á seinni æfingunni.

Fyrri æfingin

Vettel setti sinn besta tíma skömmu eftir að æfingin hófst á ný eftir árekstur Carlos Sainz við varnarvegg þegar 50 mínútur voru liðnar af æfingunni.

Þegar æfingin hófst á ný voru 23 mínútur eftir á klukkunni og Ferrari sendi báða sína ökumenn út á brautina. Vettel hafði verið 0,042 sekúndum lakari en Hamilton þegar Hamilton var á ofur-mjúkum dekkjum en Vettel á mjúkum. Vettel kom út á brautina eftir að æfingin hófst á ný og sett þá hraðasta tímann. Hamilton varð annar, Daniel Ricciardo á Red Bull þriðji, Kimi Raikkonen á Ferrari fjórði og Valtteri Bottas á Mercedes fimmti og sá síðasti sem komst innan við sekúndu frá Vettel.

Mikil rigning undir lok æfingarinnar gerði það að verkum að enginn átti raunhæfa möguleika í að skáka tíma Vettel.

Seinni æfingin

Esteban Ocon á Force India varð annar á æfingunni og sá eini sem komst í sekúndu seylingarfjarlægð frá Hamilton sem var fljótastur. Mikil rigning var á brautinni fyrri helming æfingarinnar en svo stytti upp en brautin þornaði hægt.

Einungis fimm ökumenn settu tíma á æfingunni en það voru, Hamilton og Ocon auk Sergio Perez, liðsfélaga Ocon og Felipe Massa og Lance Stroll á Williams.

Alls fóru 14 ökumenn út úr bílskúrum sínum en þeir níu sem ekki settu tíma en óku fóru einungis uppstillingarhring og svo inn aftur.

Mörg lið höfðu hugan við framhald helgarinnar og vildu spara regndekkin og lögðu því ekki í að slíta þeim á æfingunni.

Bein útsending frá tímatökunni hefst klukkan 5:50 í fyrramálið á Stöð 2 Sport og bein útsending frá keppninni hefst klukkan 4:30 á sunnudagsmorgun á Stöð 2 Sport 2.

Hér að neðan má sjá öll helstu úrslit helgarinnar á gagnvirku brautarkorti.