Erlent

Bandarískar íþróttastjörnur fordæma forsetann: „Heiður að heimsækja Hvíta húsið þangað til þú birtist“

Hulda Hólmkelsdóttir skrifar
Það á sér langa sögu að íþróttamenn mótmæli óréttlæti inni á vellinum en Donald Trump bandaríkjaforseta finnst að reka eigi þá sem mótmæla undir bandaríska þjóðsöngnum.
Það á sér langa sögu að íþróttamenn mótmæli óréttlæti inni á vellinum en Donald Trump bandaríkjaforseta finnst að reka eigi þá sem mótmæla undir bandaríska þjóðsöngnum.
Margar af þekktustu íþróttastjörnum Bandaríkjanna hafa undanfarna daga fordæmt Donald Trump Bandaríkjaforseta eftir að forsetinn sagði að reka ætti leikmenn sem mótmæla undir bandaríska þjóðsöngnum.

Trump kom fram í Alabama á föstudaginn og hélt ræðu þar sem hann sagði: „Þætti ykkur ekki frábært að sjá einn af þessum NFL eigendum, þegar einhver sýnir fánanum okkar vanvirðingu, segja „Takið þennan tíkarson af vellinum núna strax, hann er rekinn.““

„Sá eigandi [sem rekur leikmann vegna þessa] mun verða vinsælasta manneskja landsins,“ sagði forsetinn. Hann biðlaði einnig til áhorfenda að yfirgefa leikvanga þegar þeir sjá mótmæli leikmanna og uppskar mikinn fögnuð viðstaddra.

Ýmsir fótbolta- og körfuboltamenn hafa harðlega gagnrýnt forsetann vegna ummælanna. Roger Goodell, yfirmaður NFL–deildarinnar, sendi einnig frá sér tilkynningu þar sem hann sagði að ummælin væru einungis til þess að skapa sundrung og sýndu „óheppilegan skort á virðingu,“ að því er fram kemur í frétt BBC.

Trump brást þá einnig við ummælum Goodell á Twitter og sagði honum að skikka leikmenn til að standa undir þjóðsöngnum. 

Aðdragandinn að þessu öllu saman er nokkuð langur en á síðasta leiktímabili neitaði Colin Kaepernick, fyrrum leikmaður San francisco 49ers í NFL-deildinni, að rísa á fætur þegar þjóðsöngurinn var spilaður í mótmælaskyni gegn kynþáttafordómum og harkalegum lögregluaðgerðum.

Eftir mótmæli Kaepernick fóru fleiri leikmenn að leika þetta eftir og krjúpa á kné undir þjóðsöngnum, eða lyfta hnefa á loft. Þess má geta að Kaepernick er ekki á samningi hjá neinu liði í NFL-deildinni sem stendur og vilja margir meina að það megi rekja til mótmæla hans.

Stéttarfélag NFL-leikmanna hefur einnig blandað sér í málið og segir að forsetinn hafi gengið of langt með því að segja leikmönnum að „halda kjafti og spila.“ Eric Winston, forseti The NFL Players‘ Association, sagði að ummæli forsetans væru eins og blaut tuska í andlit þeirra sem barist hafi fyrir mannréttindum svartra í gegnum tíðina.

Nú virðist sem íþróttamenn í öllum deildum hafi fengið nóg. Í gærkvöldi tók hafnaboltaleikmaðurinn Bruce Maxwell af skarið í sinni deild og kraup á kné þegar þjóðsöngurinn var spilaður fyrir leik, líkt og Kapernick gerði á síðasta tímabili.



Hann sagðist vilja krjúpa fyrir þá raddlausu og þvertók fyrir að sýna landi sínu eða fána vanvirðingu, en faðir hans er í bandaríska hernum.

Stephen Curry sést hér til hægri við Barack Obama árið 2015 þegar liðinu var boðið í Hvíta húsið eftir sigur í NBA deildinni.Vísir/Getty
Þá náði Trump einnig að reita fjölmargar körfuboltastjörnur til reiði í gær þegar hann dró til baka boð til meistaraliðsins Golden State Warriors um að heimsækja Hvíta húsið. Virtist Trump ekki líka það að Stephen Curry, ein skærasta stjarna liðsins, sagði að hann myndi ekki mæta í boðið. 

Curry sagðist vilja sýna að hann og liðsfélagar hans stæðu ekki fyrir það sem forsetinn hefur sagt. 

LeBron James kom þá kollega sínum í NBA-deildinni til varnar og kallaði forsetann ónytjung.

„Það var heiður að heimsækja Hvíta húsið þangað til þú birtist,“ skrifaði James og körfuboltastjarnan Kobe Bryant blandaði sér einnig í umræðurnar.

Donald Trump

Tengdar fréttir

Trump slær heimboð til NBA-meistaranna af borðinu

Donald Trump, forseti Bandaríkjanna, hefur dregið heimboð sitt til NBA-meistaranna í Golden State Warriors til baka en um er að ræða árlega hefð. Í leiðinni skaut hann á helstu stjörnu liðsins, Stephen Curry, en sá hefur ýjað að því að hann myndi ekki þiggja heimboð forsetans.

Mest lesið


Fleiri fréttir

Sjá meira


×

Mest lesið