Sjóðheitur Dybala með þrennu í enn einum sigri Juventus

Paolo Dybala skoraði öll þrjú mörk Juventus þegar liðið lagði Sassuolo að velli, 1-3, í ítölsku úrvalsdeildinni í dag.

Dybala hefur verið sjóðheitur í upphafi tímabils og skorað átta mörk í fyrstu fjórum leikjum Juventus.

Argentínumaðurinn skoraði 11 deildarmörk á síðasta tímabili og vantar aðeins þrjú mörk til að jafna þann markafjölda.

Juventus hefur unnið alla fjóra leiki sína á tímabilinu og situr á toppi deildarinnar með 12 stig, jafn mörg og Inter en betri markatölu.

Juventus hefur orðið ítalskur meistari undanfarin sex ár og Gamla konan virðist ekkert ætla að gefa eftir í ár.