Hannes Þór: Setjum fulla stefnu á fyrsta sætið

„Ég er ótrúlega ánægður og þetta var algjört lykilatriði fyrir okkur að koma til baka. Við vorum mjög sárir eftir tapið gegn Finnum og fannst við eiga að gera betur þar og vorum gríðarlega ákveðnir í að gera það hér. Við erum ánægðir með að uppskera,“ sagði Hannes Þór Halldórsson markvörður Íslands í samtali við Vísi eftir sigurinn gegn Úkraínu í kvöld.

Íslenska liðið hafði ekki mikinn tíma til að jafna sig eftir tapið í Tampere en Hannes sagði reynsluna í liðinu hafði skipt máli í þeirri vinnu.

„Það var stuttur tími, aðeins tveir dagar en við erum reyndir og vitum út á hvað þetta gengur. Það voru haldnir góðir fundir um Úkraínu og maður sá það í augunum á mönnum að menn ætluðu sér að bæta upp fyrir þetta Finnadæmi.“

„Eins og ég upplifi þetta erum við búnir að gera ótrúlega góða hluti og við ætluðum ekki að fara að klúðra því með því að tapa fyrir Finnum og ná svo ekki úrslitum hér í kvöld. Það hefði verið svo mikil sóun,“ bætti Hannes Þór við.

Úkraína fékk gott færi í upphafi leiks en þá bjargaði Hannes Þór vel. Gestirnir voru svo hættulegir en ógnuðu helst með langskotum og hættulegum fyrirgjöfum.

„Þeir náðu einu þarna mjög óvæntu skoti á nærstöngina snemma leiks. Ég var feginn að ná niður í þann bolta. Síðan náum við að halda þeim frá markinu en þeir voru auðvitað hættulegir. Þeir koma með fyrirgjafir sem við hendum okkur fyrir og svo áttu þeir einhver langskot. Við vörðumst mjög vel og sérstaklega í seinni hálfleik.“

Hannes Þór bætti við að íslenska liðið búi að reynslu undanfarinna ára þegar þeir hafa þurft að halda í úrslit sem þeir eru ánægðir með.

„Við erum mjög góðir í að sigla heim úrslitum og sérstaklega ef við erum með tveggja marka forystu. Við höfum lent í því á síðustu árum að þurfa að halda úrslitum og erum virkilega góðir í því. Það er einn af helstu styrkleikum liðsins.“

Eftir úrslit kvöldsins er Íslands á ný komið í seilingarfjarlægð frá toppsætinu og því mikil spenna framundan enda aðeins tvær umferðir eftir í riðlinum. Næsti leikur liðsins er gegn Tyrkjum á útivelli og svo endar Íslands á heimaleik gegn Kósovó.

„Þetta voru ánægjuleg úrslit að mínu mati að Króatía skyldi tapa í kvöld. Við setjum bara fulla stefnu á fyrsta sætið. Það er í raun auðveldara að fara þannig í gegnum þetta heldur en í gegnum umspil, að vinna Tyrkland úti og Kósovó heima ef maður horfir á mögulega andstæðinga í umspili. Við gerum auðvitað allt sem við getum til að vinna riðilinn í stað þess að fara í umspil,“ sagði Hannes Þór Halldórsson að lokum.