Hannes vippaði sér úr buxunum fyrir fimm ára aðdáanda

Hannes Þór Halldórsson, markvörður karlalandsliðsins í knattspyrnu, sá til þess að ungur aðdáandi fór að sofa með stjörnur í augunum í gærkvöldi. Ungi pilturinn fékk minjagrip sem reyndar eru nokkur ár í að hann geti nýtt sjálfur. Hannes Þór gaf honum nefnilega stuttbuxurnar sem hann klæddist í 2-0 sigrinum á Úkraínu á Laugardalsvelli í gærkvöldi.

Þegar flestir höfðu yfirgefið Laugardalsvöll héldu Heimir Hallgrímsson landsliðsþjálfari og Hannes Þór aftur út á völlinn. Gengu þeir yfir grasið og til Tólfunnar, stuðningssveitar landsliðsins, sem enn trallaði í austurstúkunni. Heimir hefur haft þetta fyrir hefð eftir landsleiki og sagði nokkur vel valin orð við Tólfuna.

„Við eigum sérstakt samband. Það er margt sem við segjum þar sem fjölmiðlamenn mega ekki heyra. Ég bað alla um að slökkva á símanum þegar ég talaði,“ sagði Heimir. Orð hans væru líkast til ekki boðleg í fjölmenni.

Hannes Þór gaf treyju sína og hanska stuðningsmönnum og hélt aftur yfir völlinn. Þar veitti hann ungum aðdáendum í stúkunni athygli og hélt til þeirra til að gefa áritanir þegar heyrðist kallað:

„Hannes, má strákurinn fá buxurnar þínar?“

Hannes leit undrandi upp í stúku þar sem feðgarnir Haraldur Líndal Pétursson og Gunnar Áki Blöndal Haraldsson stóðu enn vaktina og virtust ekki á förum eftir eftirminnilegt kvöld í Laugardalnum. Það átti bara eftir að vera eftirminnilegra.

Um mínútu síðar, þegar Hannes hafði gefið nokkrar áritanir, fór hann að skimast eftir feðgunum í stúkunni. Spurði hann þá hvort þeir vildu virkilega stuttbuxurnar sínar. Haraldur jánkaði.

Skipti engum toga því Hannes reif sig úr stuttbuxunum og kastaði til feðganna. 

Óhætt að segja að sá stutti hafi verið yfir sig ánægður. Og þvílíkt kvöld fyrir þann fimm ára sem var klæddur í íslenskan landsliðsbúning.

Hann hafði fyrir leik leitt Birki Bjarnason inn á völlinn, upplifað 2-0 sigur og var nú með rauðar stuttbuxur hetjunnar sinnar milli handanna. Auk Hannesar væri Gylfi Þór Sigurðsson hans uppáhaldsleikmaður.

Í ljós kom að faðirinn Haraldur er stuðningsmaður Everton og hefur lengi verið. En nú er það eðlilega sérstaklega gaman eftir að Gylfi Þór gekk í raðir félagsins. Haraldur upplýsti blaðamann að Gunnar Áki væri stuðningsmaður Manchester United en útilokaði ekki að það myndi breytast eftir félagaskipti Gylfa.

Gaman verður að sjá hvort Gunnar Áki nái langt á sviði íþrótta en móðir hans, Anna Bryndís Blöndal, er fyrrverandi landsliðskona í handbolta þannig að hann á ekki langt að sækja íþróttagenin.