Flösku kastað í Kassim: Ég varð fyrir kynþáttafordómum

Kassim Doumbia, varnarmaður FH, varð fyrir aðkasti á leik liðsins gegn Stjörnunni í Pepsi-deild karla í gær. Flösku var kastað í andlit hans og hrópað á hann ókvæðisorðum.

Þetta segir hann í viðtali við Fótbolta.net en Birgir Jóhannsson, framkvæmdastjóri knattspyrnudeildar FH, staðfestir það einnig í samtali við Vísi.

Doumbia sagði að flaskan hefði farið í andlitið hans og öxl. Hann bætir einnig við að það hafi verið öskrað á hann á meðan leiknum stóð.

„Ég skil ekki íslensku vel en þeir voru að öskra á mig eitthvað kjaftæði. Það voru kynþáttafordómar,“ sagði hann við Fótbolta.net.

Birgir sagði að FH-ingar líti atvikið alvarlegum augum en ætli að bíða með næstu skref þar til að frekari upplýsingar liggja fyrir.

„Við ætlum að skoða þetta betur innan okkar raða,“ sagði Birgir.