Knattspyrnusambandið búið að ráða nýjan fjármálastjóra

Bryndís Einarsdóttir hefur verið ráðin fjármálastjóri KSÍ. Hún tekur við starfinu af Pálma Jónssyni sem gegndi því í mörg ár.

Bryndís var valin úr hópi 64 umsækjanda um starfið en Capacent sá um umsjón ráðningaferlisins að því er fram kemur á heimasíðu KSÍ.

Bryndís er með MBA próf í viðskiptafræði frá Davenport University, Michigan, og þá er hún einnig menntuð sem íþróttafræðingur (BSc).

Bryndís hefur mikla reynslu af rekstri. Hún var búsett í Bandaríkjunum í 12 ár og starfaði þar sem skrifstofustjóri fasteignafélagsins NPCOA. Frá 2006 hefur Bryndís m.a. starfað sem fjárreiðustjóri hjá Lagernum ehf. og nú síðast sem fjármála- og framkvæmdastjóri The Pier.

Bryndís hefur störf hjá KSÍ 1. október næstkomandi.