Petrea I. Guðmundsdóttir nýr framkvæmdastjóri Gló

Petrea I. Guðmundsdóttir hefur verið ráðin nýr framkvæmdastjóri Gló. Gló rekur nú fjóra veitingastaði og verslun í Fákafeni, Engjateig, Laugavegi og Hæðasmára auk þess að bjóða upp á fyrirtækjaþjónustu og þjónustu til einstaklinga.

Í tilkynningu frá fyrirtækinu segir að hlutverk Petreu verði að annast daglegan rekstur Gló á Íslandi en áhersla verður lögð á að sækja aukin vöxt og auka arðsemi félagsins.

Petrea hefur lengst af starfað á sviði fjarskipta- og afþreyingar en hún hefur meðal annars verið framkvæmdastjóri Tals, framkvæmdastjóri hjá Símanum, 365 og Skjánum.

Petrea er viðskiptafræðingur frá Háskóla Íslands. Hún situr í stjórn Icepharma, Gámaþjónustunnar og er stjórnarformaður Símafélagsins.

Gló er í meirihlutaeigu Eyju fjárfestingafélags, og eru eigendur þess Birgir Þór Bieltvedt og Eygló Björk Kjartansdóttirr, auk þess er félagið í eigu hjónanna Sólveigar Eiríksdóttur og Elíasar Guðmundsson.