Hljóp einn og komst í undanúrslit

Isaac Makwala frá Botsvana tryggði sér sæti í undanúrslitum í 200 metra hlaupi karla á HM í frjálsum íþróttum í London nú síðdegis.

Það er kannski ekki í frásögur færandi nema fyrir þær sakir að Makwala hljóp einn.

Ástæðan fyrir því er að Makwala greindist með nóróveirusýkingu. Samkvæmt reglum Alþjóðafrjálsíþróttasambandsins þurfa keppendur sem sýna einhver einkenni veikinda að vera í sóttkví í 48 klukkutíma.

Makwala missti því af undanrásunum í 200 metra hlaupi og úrslitum í 400 metra hlaupi. Það var hins vegar ákveðið að gefa honum tækifæri á því að komast í undanúrslitin í 200 metra hlaupi og Makwala hljóp því einn síðdegis.

Botsvana-maðurinn þurfti að hlaupa a.m.k. á 20,53 sekúndum til að komast í undanúrslitin. Og það tókst. Makwala hljóp á 20,20 sekúndum og tryggði sér sæti í undanúrslitunum sem fara fram klukkan 19:55 í kvöld.