Texti Despacito of kynferðislegur

Yfirvöld í Malasíu hafa bannað spilun á laginu Despacito á útvarps- og sjónvarpsstöðvum í eigu ríkis landsins.

Þetta segir Salleh Said Keruak, samskipta og margmiðlunarráðherra landsins, í samtali við fréttastofu AFP. Lagið þykir ekki samræmast gildum múslimatrúar, sem meirihluti Malasíubúa aðhyllist. Keruak segir að ráðuneytinu hafi borist fjölmargar kvartanir vegna kynferðislegra texta lagsins.

„Despacito verður ekki spilað á stöðvum í eigu ríkisins vegna kvartana almennings. Textinn er þess eðlis að hann eigi ekki að heyrast,“ segir Said Keruak.

Hann segist jafnframt vona að einkareknar stöðvar í landinu taki ríkið sér til fyrirmyndar.

„Einkareknar stöðvar í Malasí hvetjum við til að ritskoða sjálfar sig.“

Lagið Despacito er vinsælasta lag heims um þessar mundir og er meðal annars mest streymda lag allra tíma, en hlustað hefur verið á lagið yfir 4,6 milljarð sinnum á hinum ýmsu stryemisveitum.

Í Malasíu gilda ströng lög um ritskoðun og hafa yfirvöld áður bannað ýmis lög sem þykja fara yfir strikið.

Lagið er hins vegar ekki bannað hér á landi og því má heyra það, með viðbót söngvarans Justin Bieber, í spilaranum hér fyrir neðan.