Jeff Horn, fyrrverandi íþróttakennari, gerði sér lítið fyrir og sigraði Manny Pacquiao, einn fremsta boxara síðari ára, í WBO titilbardaga í veltivigt í gær.
Bardaginn fór fram í Brisbane í Ástralíu, heimaborg hins 29 ára gamla Horns.
Dómararnir þrír dæmdu allir Horn sigurinn sem þótti umdeilt. Hann hefur nú unnið 17 af 18 bardögum sínum á ferlinum en einn endaði með jafntefli.
Talið er að Horn fái a.m.k. hálfa milljón Bandaríkjadala í sinn hlut fyrir bardagann.
Pacquiao, sem hefur átta sinnum orðið heimsmeistari, hefur tapað fjórum af síðustu níu bardögum sínum.
