Meirihluti þingnefndar vill kanna stjórnsýslu vegna Reykjavíkurflugvallar

Meirihluti stjórnskipunar- og eftirlirlitsnefndar Alþingis hefur óskað eftir því að Ríkisendurskoðun meti hvort stjórnssýslulega hafi verið rétt staðið að lokun minnstu flugbrautar Reykjavíkurflugvallar á síðasta ári og sölu lands ríkisins við flugvöllinn.

Njáll Trausti Friðbertsson þingmaður Sjálfstæðisflokksins og fulltrúi í stjórnskipunar- og eftirlitsnefndar Alþingis segir meirihluta nefndarinnar telja nauðsynlegt að stjórnsýsla varðandi lokun flugbrautarinnar verði skoðuð frekar.

Spurningar hafi vaknað eftir að fulltrúar í öryggisnefnd Félags íslenskra atvinnuflugmanna mætti með gögn um málið á fund nefndarinnar í mars. En þá hafi einnig fulltrúar Ísavía og Samgöngustofu komið fyrir nefndina.

„Þá kom fram meðal annars að um tímabundna lokun hafi verið að ræða í júlímánuði í fyrra. Í framhaldi, eins og menn muna, var landið við suð-vesturenda nayeðarbrautarinnar selt í ágúst í fyrra. Það átti að gerast þegar búið væri að loka flugbrautinni formlega,“ segir Njáll Trausti.

Málið snýst þar að leiðandi að huta til um hvort réttar forsendur hafi verið fyrir hendi þegar ríkið seldi Reykjavíkurborg hluta flugvallarlandsins. Áður en Njáll Trausti varð þingmaður fyrir Sjálfstæðisflokkinn í Norðausturkjördæmi var hann framarlega í samtökunum Hjartað í Vatnsmýri sem börðust gegn lokun minnstu flugbrautarinnar á Reykjavíkurflugvelli sem samtökin kalla yfirleitt neyðarbraut.

Í gegnum árin hefur verið skrifað undir fjölda yfirlýsinga og samkomulaga milli Reykjavíkurborgar og fjölda ráðherra um framtíð Reykjavíkurflugvallar, sem samkvæmt skipulagi á að vera horfinn með öllu úr Vatnsmýrinni eftir sjö ár. Þá eru Valsmenn hf. byrjaðir að byggja við annan enda umræddrar flugbrautar samkvæmt skipulagi borgarinnar og Hæstiréttur hefur einnig úrskurðað í málinu.

Njáll Trausti segir engu að síður nauðsynlegt að skoða hvort stjórnsýsla ráðuneytis, borgar og Ísavía hafi verið eðlileg í málinu.

Heldur þú að þetta breyti einhverju um það að þessi flugbraut er farin. Það er m.a. byrjað að byggja á svæðinu?

„Já, það verður náttúrlega bara að koma í ljós hvernig stjórnsýslan tekur á því. Líka varðandi framhaldið og Reyljavíkurflugvöll og önnur verkefni sem ríkið á þátt í og samskipti við sveitarfélög og annað. Þá hlýtur alltaf að vera þessi frumskylda; að staðið sé rétt að málum og það er það sem við viljum fá fram. Síðan verður bara að koma í ljós varðandi Reykjavíkurflugvöll hvernig menn ætla að takast á við það ef kemur í ljós að illa hafi verið staðið að málinu. Segjum sem svo að það geti orðið niðurstaða. Þá verður stjórnsýslan bara að takast á við það,“ segir Njáll Trausti Friðbertsson.