Sól og hiti áfram í kortunum: 20 stiga hiti þriðja daginn í röð

Blíðviðrið sem verið hefur undanfarna daga leikur áfram við landsmenn í dag og yfir helgina en í hugleiðingum veðurfræðings á vef Veðurstofu Íslands segir að hlýja loftið sitji enn yfir landinu og þar sem sólin skíni einnig muni hitinn ná sér vel á strik. Mögulega mun því mælast 20 stiga hiti á landinu þriðja daginn í röð.

„Vindur er auk þess með allra hægasta móti svo um er að ræða einmuna veðurblíðu. Sums staðar er þokuloft við strendur og mun svalara.

Á morgun verður áfram hægur vindur, en vindstefnan verður norðlæg í grunninn og þá er eindregnari þokuspá með norður- og austurströndinni. Á Suður- og Vesturlandi ætti að verða bjart og hlýtt, sérílagi í uppsveitum.

Á sunnudag og í byrjun næstu viku er áfram útlit fyrir rólegt og þurrt veður, en væntanlega verður meira skýjað og hitatölurnar síga niður á við,“ segir í hugleiðingum veðurfræðingsins.

Þá segir að góðviðriskaflanum ljúki á miðvikudaginn í næstu viku þar sem spáð er hvassri norðaustanátt með úrkomu og ört kólnandi veðri.

Veðurhorfur á landinu næstu daga eru annars þessar:

Hægviðri í dag, yfirleitt léttskýjað og hiti 13 til 19 stig, en sums staðar þokubakkar við sjávarsíðuna og mun svalara.

Fremur hæg norðlæg átt á morgun. Skýjað með köflum N- og A-lands, þokuloft og svalt við ströndina, en léttskýjað fyrir sunnan og vestan með hita að 19 stigum.

Á sunnudag:

Hæg breytileg átt og víða skýjað, en bjartviðri á N- og A-landi. Hiti 5 til 17 stig, hlýjast í innsveitum NA-til.

Á mánudag:

Vestlæg átt, 5-10 m/s og skýjað, en bjart með köflum A-lands. Hiti 6 til 16 stig, hlýjast fyrir austan.

Á þriðjudag:

Vestlæg átt og skýjað að mestu, en vaxandi norðaustanátt síðdegis og fer að rigna NV-til. Kólnandi veður.

Á miðvikudag og fimmtudag:

Útlit fyrir hvassa norðaustanátt með rigningu víða á landinu, en slyddu fyrir norðan og jafn vel snjókomu til fjalla. Svalt í veðri.