Hótaði hnífstungu og nauðgun

Hæstiréttur hefur framlengt gæsluvarðhald yfir manni, sem grunaður er um að hafa stungið annan mann í höndina og svo látið hann millifæra á reikning sinn rúma milljón króna í mars síðastliðnum, um fjórar vikur. Atvikið átti sér stað í Skautahöllinni í Laugardalnum í lok mars en þá var manninum gert að sæta fjögurra vikna varðhaldi.

Maðurinn sem grunaður er fór fram á að gæsluvarðhaldsúrskurðurinn yrði felldur úr gildi, en til vara krafðist hann þess að fá frekar að dvelja á Vogi og í framhaldi af því í lokuðu meðferðarúrræði á vegum SÁÁ eða Hlaðgerðarkoti.

Bar hníf að hálsi hans og hótaði nauðgun

Manninum er gefið að sök að hafa ógnað öðrum manni með hníf og neytt hann til að millifæra af reikningi hans rúmlega eina milljón króna. Brotaþoli segir manninn hafa borið hnífinn að hálsi sínum og krafið hann um fjármunina, og að þegar hann hafi neitað hafi maðurinn stungið sig í handarbak vinstri handar.

Þá segir hann manninn einnig hafa haft uppi hótanir um að stinga hann og skera, og hótað því að nauðga honum ef hann segði frá atvikinu. Þá hafi maðurinn einnig stolið af sér bakpoka, fartölvu og farsíma.

Maðurinn er einnig grunaður um að hafa reynt að brjótast inn í bíl við Þróttarsvæðið. Vitni hafi tekist að stöðva manninn, en segir hann hafa hótað að stinga sig.

Liggur undir sterkum grun

Að mati Hæstaréttar liggur maðurinn undir sterkum grun um að hafa gerst sekur um fyrrnefnda háttsemi og var hann þar af leiðandi úrskurðaður í gæsluvarðhald til 24. maí næstkomandi á grundvelli almannahagsmuna. Maðurinn hefur áður komið við sögu lögreglu en hann hefur meðal annars verið sakfelldur fyrir rán og fíkniefnalagabrot. Þá er til meðferðar hjá héraðssaksóknara mál á hendur manninum er varðar rán, fjárkúgun, frelsissviptingu, og hótanir.