Skaginn bætir við pólskum sóknarmanni

Skagamenn halda áfram að styrkja liðið fyrir átökin í Pepsi-deildinni sem hefst um aðra helgi en ÍA er búið að ganga frá samningi við pólska sóknarmanninn Patryk Stefanski.

Þessi 27 ára gamli leikmaður kemur frá Ruch Chorzów í heimalandinu en hann heillaði þjálfaralið ÍA í æfingaferð liðsins þar sem hann spilaði leik á móti HK.

Fram kemur í fréttatilkynningu frá ÍA að þarna sé á ferð geysilega vinnusamur leikmaður með mikinn hraða.

Stefanski er annar pólski leikmaðurinn sem Skagamenn fá til sín en áður var mættur varnarmaðurinn Robert Mentzel sem á að fylla í skarð Ármanns Smára Björnssonar sem lagði skóna á hilluna fyrr í vetur.

„Við erum sáttir með að það bæta inn sóknarmanni áður en tímabilið hefst og eykur þar með breiddina í sóknarleik liðsins. Patryk kemur með mikinn kraft inní okkar leik - hefur góðan hraða og er jafnfættur og eykur að sjálfsögðu alla samkeppni í sóknarlínu okkar," segir Gunnlaugur Jónsson, þjálfari ÍA.