NBA: Cleveland, Golden State, San Antonio töpuðu öll og Boston græddi mest | Myndbönd

Cleveland Cavaliers missti toppsæti Austurdeildar NBA-deildarinnar í körfubolta í nótt þegar liðið tapaði enn einum leiknum því á sama tíma vann Boston Celtics liðið sinn leik. Boston tryggir sér heimavallarrétt fram í lokaúrslitin með sigri í lokaleik tímabilsins.

Í Vesturdeildinni þá töpuðu þrjú bestu liðin, Golden State Warriors, San Antonio Spurs og Houston Rockets, öll sínum leikjum en Los Angeles Clippers vann aftur á móti sinni sjötta leik í röð. Utah Jazz endaði fjórtán leikja sigurgöngu Golden State Warriors og lið LA Clippers og Utah Jazz berjast um fjórða sætið í Vesturdeildinni.

Tyler Johnson skoraði 24 stig þar á meðal fjögur síðustu stigin á vítalínunni þegar Miami Heat vann 124-121 sigur á Cleveland Cavaliers í framlengingu. Cleveland Cavaliers tapaði þar með annað kvöldið í röð í framlengingu en þetta var jafnframt tólfta tap Cleveland liðsins í síðasta 21 leik sínum.

Hassan Whiteside var með 23 stig og 18 fráköst fyrir Miami og Josh Richardson skoraði 19 stig. Deron Williams var með 35 stig og 9 stoðsendingar fyrir Cleveland sem var með hálfgert varalið. Kevin Love var með 25 stig og Channing Frye skoraði 21 stig.

Cleveland Cavaliers lék án LeBron James, Kyrie Irving og Tristan Thompson en Cavaliers liðið hefur tapað öllum sjö leikjunum sem LeBron James hefur misst af á leiktíðinni.

Isaiah Thomas var stigahæstur hjá Boston Celtics með 27 stig en liðið nýtti sér tap Cleveland og náði efsta sætinu með 114-105 sigri á Brooklyn Nets. Ef Boston menna vinna lokaleikinn sinn á móti Milwaukee Bucks þá verður efsta sæti austursins þeirra.

Verði liðin með jafnmarga sigra þá verður Cleveland ofar á betri árangri í innbyrðisviðureignum. Al Horford var með 19 stig og 8 fráköst fyrir Boston en Íslandsvinurinn Jeremy Lin var atkvæðamestur hjá Brooklyn með 26 stig og 12 fráköst.

Stephen Curry og Kevin Durant léku aftur saman á ný og Golden State Warriors tapaði sínum fyrsta leik í langan tíma. Kevin Durant. Golden State Warriors tapaði 99-105 á heimavelli á móti Utah Jazz en hafði fyrir leikinn unnið fjórtán í röð. Þetta var annar leikur Durant eftir hnémeiðslin en Curry var hvíldur í þeim fyrsta.

Leikurinn var jafn eftir þrjá leikhluta en Steve Kerr, þjálfari Golden State Warriors, ákvað samt að hvíla sína bestu menn í lokaleikhlutanum en Golden State liðið var fyrir leikinn búið að tryggja sér besta árangurinn í deildarkeppninni í vetur.

Stephen Curry skoraði 29 stig í þremur leikhlutum og Kevin Durant var með 16 stig, 10 fráköst og 6 stoðsendingar. Utah tókst að vinna þrátt fyrir að vera án lykilmanna eins og þeirra Gordon Hayward og Derrick Favors. George Hill skoraði 20 stig fyrir Utah, Joe Johnson var með 19 stig og Rudy Gobert bætti við 17 stigum og 18 fráköstum.

Noah Vonleh skoraði sigurkörfuna rétt áður en leiktíminn rann út þegar Portland Trail Blazers vann 99-98 sigur á San Antonio Spurs 99-98. Portland hvíldi sína bestu menn, þá Damian Lillard og CJ McCollum en tókst samt að vinna eitt besta lið deildarinnar.

Shabazz Napier skoraði 32 stig fyrir Portland í þriðja sigri liðsins í röð en Kawhi Leonard var atkvæðamestur hjá San Antonio Spurs með 18 stig. Lamarcus Aldridge og Tony Parker skoruðu báðir 12 stig. Hetja Portland, Noah Vonleh, endaði með 12 stig og 11 fráköst.

Los Angeles Clippers liðið fór illa með Houston Rockets í 125-96 í sigri og er nú með jafnmarga sigra og Utah Jazz í baráttunni um fjórða sætið í Vesturdeildinni. Þetta var sjötti sigur Clippers-liðsins í röð sem er að koma á siglingu inn í úrslitakeppnina.

Chris Paul skoraði 19 stig, gaf 9 stoðsendingar og stal 4 boltum en Blake Griffin var með 18 stig og Jamal Crawford kom með 19 stig af bekknum. Eric Gordon skoraði 17 stig fyrir Houston en James Harden lét sér nægja 14 stig, 7 frákös og 6 stoðsendingar.

Úrslit í leikjum NBA-deildarinnar í nótt:

Golden State Warriors - Utah Jazz    99-105    

Los Angeles Clippers - Houston Rockets    125-96    

Portland Trail Blazers - San Antonio Spurs    99-98    

Chicago Bulls - Orlando Magic    122-75    

Detroit Pistons - Washington Wizards    101-105    

Milwaukee Bucks - Charlotte Hornets    89-79    

Boston Celtics - Brooklyn Nets    114-105    

Miami Heat - Cleveland Cavaliers    124-211 (108-108)    

Philadelphia 76ers - Indiana Pacers    111-120