Ofanhríð í kortunum á föstudaginn langa

Búast má við ofanhríð á Austfjörðum á morgun, föstudaginn langa, að því er fram kemur í ábendingum frá veðurfræðingi á vef Vegagerðarinnar.

Þar segir að í dag hafi snjóað austan og suðaustan lands í hægum vindi en að í fyrramálið dýpki lægð fyrir suðaustan land og við það gerir hvassa norðanátt sem gæti náð allt að 15 til 20 metrum á sekúndu.

Það má því reikna með skafrenningi og að á köflum verði mjög blint til aksturs, einkum frá Breiðamerkursandi og austur á Hérað.

Færð og aðstæður á vegum eru annars sem hér segir:

Það eru hálkublettir og éljagangur á Reynisfjalli en annars eru vegir greiðfærir á Suðurlandi.

Á Vesturlandi er hálka og skafrenningur á Holtavörðuheiði en hálkublettir á Bröttubrekku.

Vetrarfærð er á flestum fjallvegum á Vestfjörðum, nokkur hálka eða snjóþekja og skafrenningur. Þæfingsfærð og skafrenningur er á Hrafnseyrarheiði en Dynjandisheiði er ófær.

Það er þungfært norður í Árneshrepp og skafrenningur.

Á Norðurlandi er krap á Siglufjarðarvegi og hálka á örfáum útvegum en víðast eru aðeins hálkublettir eða alveg greiðfært.

Á Austurlandi er víða nokkur éljagangur og hálkublettir eða jafnvel snjóþekja. Það er hálka á Möðrudalsöræfum og á Breiðdalsheiði en Öxi er ófær.

Greiðfært er með suðausturströndinni.