Stormur á öðrum degi páska

Búist er við að lægð gangi yfir landið á öðrum degi páska og ráðleggur því Veðurstofa Íslands ferðalöngum að fylgjast vel með spám og íhuga hvort breyta þurfi ferðaáætlunum. 

Þetta kemur fram í hugleiðingu veðurfræðings á Veðurstofu Íslands en hann gerir ráð fyrir því að veðrið í dag verði áþekkt því sem var í gær, við bjartviðri og léttskýjað syðra. Hiti að fimm stigum sunnan til en annars vægt frost.

Á morgun, páskadag, er útlit fyrir svipað veður en vindur verður austlægari um kvöldið. Á öðrum degi páska, mánudag, gengur hins vegar lægð yfir landið með suðaustan stormi og snjókomu síðdegis en slyddu eða rigningu síðar. Búist er við hlýnandi veðri í kjölfarið.

Veðurhorfur á landinu næstu daga:

Á mánudag (annar í páskum):

Gengur í suðaustan storm síðdegis með snjókomu og síðan slyddu eða rigningu og heldur hlýnandi veðri. Hægari og úrkomulítið norðaustantil.

Á þriðjudag:

Suðvestan 5-10 og él. Þykknar upp með rigningu eða slyddu vestantil um kvöldið, en léttir til austanlands. Hiti 0 til 7 stig, mildast SA-lands.

Á miðvikudag:

Allhvöss suðvestlæg átt, rigning og sums staðar slydda, en þurrt að mestu austanlands. Hiti 0 til 5 stig. Kólnar og fer yfir í él vestanlands um síðdegis.

Á fimmtudag (sumardagurinn fyrsti):

Vestan- og norðvestanátt með éljum, einkum norðaustantil. Hiti yfir frostmarki við S- og V-ströndina, en annars vægt frost.

Á föstudag:

Útlit fyrir fremur svala norðvestanátt með éljum um landið N-vert, en bjartviðri syðra.