Emil og félagar réðu ekki við Napoli

Emil Hallfreðsson var á sínum stað í byrjunarliði Udinese sem laut í lægra haldi fyrir Napoli í kvöld. Lokatölur 3-0, Napoli í vil.

Dries Mertens, Allan og José Callejón skoruðu mörk Napoli sem er í 3. sæti ítölsku úrvalsdeildarinnar með 70 stig, 10 stigum á eftir toppliði Juventus. Tórínó-liðið vann 0-2 útisigur á botnliði Pescara fyrr í dag. Gonzalo Higuaín skoraði bæði mörkin.

Emil og félagar eru í 11. sæti deildarinnar. Tapið í kvöld var þeirra fyrsta í sex leikjum.

Roma gerði 1-1 jafntefli við spútniklið Atalanta. Rómverjar eru í 2. sæti deildarinnar, átta stigum á eftir Juventus.