Spá því að Svala rjúki upp úr riðlinum

Ísland verður eitt tíu landa sem fer áfram úr fyrra undanúrslitakvöldi Eurovision samkvæmt könnun ESC Today.

Alls koma 42 lönd til með að taka þátt í keppninni í ár en könnunin fór fram á Facebook og er Svölu Björgvins spáð fjórða sætinu í fyrra undanúrslitakvöldinu í Kænugarði þann 9. maí. Svala fer fyrir Íslands hönd með lagið Paper.

Í könnun ESC Today segir að Svíar verði efstir þann 9. maí en fyrir þeirra hönd fer Robin Bengtsson með lagið I Can’t Go On. Því næst koma Belgar og Portúgalar og í fjórða sætinu er Svala okkar Björgvinsdóttir. Seinna undanúrslitakvöldið fer fram 11. maí og segja fylgjendur ESC Today á Facebook að Ísrael fái þar flest atkvæði

Facebook-fylgjendur ESC Today telja líklegast að Ítalir vinni Eurovision þann 13. maí í Kænugarði.