Breski auðkýfingurinn vill varpa ljósi á hvað fyrir honum vakir

„Á síðustu vikum hefur mér orðið æ ljósara að hlutdeild mín í veiðiklúbbnum Streng hefur vakið athygli fjölmiðla og ég taldi ráðlegt að ég varpaði ljósi á hvað fyrir okkur vakir,“ segir breski milljarðamæringurinn Jim Ratcliffe í aðsendri grein í Fréttablaðinu í dag.

Ratcliffe hefur vakið nokkra athygli vegna kaupa hans á jörðum hér á landi. Hann keypti til að mynda í Grímsstöðum á Fjöllum og jörðum í Vopnafirði, en tilraunir hans til jarðakaupa tengjast þekktum laxveiðiám.

Umhverfismál og varðveisla villta laxins í Norður-Atlantshafi er uppgefin ástæða Ratcliffe fyrir kaupunum. Ratcliffe á í veiðifélaginu Streng og í pistli sínum segir hann félagið hafa eitt meginmarkmið – að vernda þá einstöku tegund sem laxinn sé, líkt og hann orðar það.

„Í stuttu máli er verndunarstefna okkar að halda í hreinleika landslags og áa, hvetja til búskapar í sátt og samlyndi við ár og ástundun ábyrgrar sportveiði sem styrkir sjálfbærni til framtíðar. Við í Streng vitum að við getum lítið gert við ofveiði á laxi í sjó – slíkt er á ábyrgð stjórnvalda. En við getum skapað náttúrulegan griðastað fyrir lax á þessu afar sérstæða horni á norðaustur Íslandi og vonandi bjargað þessari einstæðu tegund,“ segir hann í pistlinum.

Rekur stóra efnaframleiðslu

Ratcliffe á og rekur fyrirtækið Ineos Group Limited, sem er efnaframleiðslurisi með umsvif í öllum heimshlutum og er fyrirtækið talið velta milljörðum punda á ári. Erlendir fjölmiðlar hafa því efast um að umhverfismálin séu manninum sérstaklega hugleikin.

Ratcliffe fullyrðir hins vegar að markmið Strengs sé að finna sjálfbæra lausn til langs tíma. Fáein góðgerðafélög séu ekki lausnin. „[L]axinn hefur átt erfitt uppdráttar síðustu 100 árin. Samspil mengunar og ofveiði hefur gengið nærri stofnum og þurrkað tegundina algjörlega út í mörgum ám.“

Hann segir að kaup sín á jörðum í nágrenni við ár á Norðurausturlandi, þá sérstaklega í kringum Vopnafjörð, séu til þess að eiga atkvæðisrétt í veiðifélögum. „Þar sem við höfum keypt jarðir höfum við hvatt bændur til að halda áfram búskap á þessum fjarlæga hluta Íslands.“

Þá segir hann tilganginn með kaupunum á Grímsstöðum að vernda og varðveita viðkvæmt vistkerfi mikilvægra áa.

Hálfgerður huldumaður

Jafnframt tekur Ratcliffe það fram að hann hafi skapað sína auðlegð sjálfur. Hann hafi alist upp í fátækum hluta Manchester en borið gæfu til þess að byggja upp farsælt fyrirtæki. Á grundvelli þess árangurs sé hann í aðstöðu til að hjálpa á sviðum sem hann tleji að eigi skilið athygli.

Ítarlega hefur verið fjallað um Jim Ratcliffe, kaup hans á jörðum hér á landi og fyrirtæki hans úti í heimi, í Fréttablaðinu. Þar var greint frá því að Ratcliffe sé hálfgerður huldumaður í alþjóðlegu viðskiptalífi og að lítið beri á honum persónulega, öfugt við umsvif viðskiptaveldis hans.

Þá fjallaði breska blaðið Guardian um Ineos, fyrirtæki Ratcliffe, í september síðastliðnum og áform þess um að hefja vinnslu á jarðgasi í Bretlandi með svokölluðu bergbroti, sem hefur verið umdeild aðferð við orkuöflun víða um heim.

Lesa má pistil Jim Ratcliffe í heild hér.