Aron og félagar unnu með marki á síðustu stundu

Aron Sigurðarson var í byrjunarliði Tromsö sem vann góðan útisigur á Viking, 1-2, í norsku úrvalsdeildinni í fótbolta í kvöld.

Aron og félagar fara vel af stað á tímabilinu en þeir gerðu 1-1 jafntefli við Brann í 1. umferðinni.

Aron fór af velli í uppbótartíma, skömmu eftir að Gjermund Åsen skoraði sigurmark Tromsö.

Viðar Ari Jónsson sat allan tímann á varamannabekknum þegar Brann vann 3-0 sigur á Strömsgodset á heimavelli.

Þá féll AGF úr leik í 8-liða úrslitum dönsku bikarkeppninnar eftir 2-1 tap fyrir FC Köbenhavn.

Björn Daníel Sverrisson var í byrjunarliði AGF og átti þátt í marki liðsins. Theodór Elmar Bjarnason var á bekknum hjá AGF.