Zak Brown: Honda fjárfestir til að gera vélina samkeppnishæfa

Zak Brown, framkvæmdastjóri McLaren liðsins í Formúlu 1 segir að Honda sé að gera allt sem hægt er til að vélin verði samkeppnishæf sem fyrst.

Mclaren liðið er það eina sem notar Honda vélarí Formúlu 1. Liðið hefur átt afleitt undirbúningstímabil með Honda vélina um borð. Vélin dugði mest 11 hringi í röð á æfingum áður en hún bilaði.

Vandamálið felst í því að vélin hristist of mikið. Rafkerfið sem er stór hluti vélarinnar, þolir ekki titringinn.

Brown segir að bæði McLaren og Honda séu að gera allt til að láta verkefnið ganga upp, þrátt fyrir þreifingar McLaren sem leitaði til Mercedes um að fá mögulega vélar frá heismeisturunum.

„Við erum í sambandi við Honda og erum að reyna að finna út hvaða langtíma áætlun er best, en við þurfum líka að sjá skammtíma framfarir,“ sagði Brown í samtali við RACER.

„Við þurfum að laga vandamálin okkar hratt, svo við erum að leita allra leiða til þess.“

„Við erum með aðra samstarfsaðila sem búast við góðum úrslitum og við viljum halda góðu samstarfi við Honda en við þurfum líka að huga að Chandon, NTT, Jhonnie Walker og SAP. Þau vilja góð úrslit.“

„Honda er að fjárfesta eins og þarf, þeir hafa einbeittan vilja til þess að gera vélina samkeppnishæfa og eru þess vegna réttur samstarfsaðili. Við erum með tæknilegt vandamál sem við verðum að finna lausn á afar, afar fljótlega.“

Fyrsta keppni tímabilsins fer fram í Ástralíu um helgina. Tímatakan og keppnin verða í beinni útsendingu í leiftrandi háskerpu á Stöð 2 Sport. Tryggðu þér áskrift á 365.is.