Ferrari sýnir klærnar og fær heimsmeistara

„Við erum að fara að sjá öflugasta Formúlu 1-tímabil frá upphafi. Það er þannig sem menn tala um þetta ár.“

Þetta segir Rúnar Jónsson, aðalsérfræðingur Stöðvar 2 Sport um nýtt tímabil í Formúlunni sem hefst snemma á sunnudagsmorgun þegar bílarnir ræsa af stað í Ástralíu.

Óvissan er mikil fyrir tímabilið vegna mikilla breytinga á bílunum en eitt er ljóst: Ríkjandi heimsmeistari ver ekki titilinn. Nico Rosberg, sem ók fyrir Mercedes, þakkaði fyrir sig eftir að vinna sinn fyrsta titil á síðasta ári og lagði hjálminn á hilluna.

Miklu fljótari bílar

„Breytingar á smíði bílanna eru svakalegar. Það er búið að breikka þá alla, breikka vængina og dekkin. Menn fá allt að 30 prósent meira niðurtog og bílarnir eru með 25 prósent breiðari dekk,“ segir Rúnar en hverju skilar þetta allt saman?

„Miklu hraðskreiðari bílum. Við sáum það strax við æfingarnar í Barcelona í vetur að menn voru að keyra fjórum sekúndum hraðar en í fyrra. Kimi Räikkönen var með besta tímann alveg eins og í fyrra. Þessir bílar eru bara þvílíkar græjur núna.“

Rúnar segir liðin halda spilunum þétt að sér eins og vanalega og því er erfitt að lesa í hvað gerist í Ástralíu þegar fyrsta keppnin fer fram.

„Það er alltaf ákveðin óvissa en maður vonast með þessum breytingum til að fleiri lið geti tekið þátt í toppbaráttunni. Þetta hefur verið algjör einokun Mercedes undanfarin ár. Ferrari-bílarnir koma gríðarlega öflugir til leiks og þar virðist vera alvöru keppinautur. Liðin eru samt alltaf eitthvað að laumupúkast þannig að við sjáum hvað kemur upp úr krafsinu á sunnudaginn,“ segir Rúnar.

Samkeppnin mikilvæg

Eftir fjögur ár af algjörri drottnun Red Bull þar sem Sebastian Vettel vann fjórum sinnum í röð tóku við þrjú ár af annarri eins drottnun Mercedes. Lewis Hamilton vann tvö ár í röð og Nico Rosberg í fyrra. Rúnar viðurkennir fúslega að samkeppnin verði að vera meiri svo að þetta sé áhugavert.

„Algjörlega. Meira að segja þegar Michael Schumacher vann fimm sinnum í röð fékk hann samt alvöru samkeppni frá Mika Häkkinen, David Coulthart, bróður sínum Ralf og fleirum. Hann var að vinna í spennandi keppnum. Það er líka hugmyndin með þessum breytingum að stokka upp spilin til að koma fleiri liðum inn í baráttuna. Það er ekkert gaman þegar eitt lið stingur af,“ segir Rúnar en eins og alltaf hafa liðin lagt mikið í sölurnar.

„Með þessum miklu breytingum gjörbreytist landslagið. Það er allt öðruvísi nema vélbúnaðurinn. Óvissan er svo mikil því það eru svo margir framleiðendur með aragrúa starfsmanna. Bara Mercedes er með 1.500 starfsmenn og Ferrari með í kringum 1.000. Þessi lið eru með um 100 manna hönnunarteymi sem eru bara að leika sér í bíla-LEGO. Pressan er bara aðeins meiri hjá þeim því allt verður að heppnast.“

Annar fljúgandi Finni

Ein stærstu tíðindin á ökumannamarkaðnum var þegar Finninn Valtteri­ Bottas var keyptur frá Williams yfir til meistara Mercedes eftir að Rosberg ákvað óvænt að hætta. Það kemur Rúnari ekki á óvart að hann fái svona stórt tækifæri.

„Þetta er magnaður ökumaður. Yfirleitt koma bara góðir Finnar inn í Formúluna. Hann náði frábærum árangri með Williams og það hjálpar honum að Williams var að nota Mercedes-vélar. Mercedes þekkir hann því aðeins í gegnum þau samskipti. Hann er ofboðslega fljótur og engin spurning að hann á þetta sæti skilið,“ segir Rúnar.

Upprisa Ferrari

Ferrari, stærsta og frægasta liðið í Formúlu 1, hefur ekki eignast heimsmeistara frá árinu 2007 þegar Kimi Räikkönen sigraði. Þeir rauðu hafa lent undir í baráttunni við Red Bull fyrst og svo Mercedes en nú gæti orðið breyting á.

„Ég er spenntur fyrir Ferrari og trúi ekki öðru en að þetta stóra og sterka lið sýni klærnar. Það vann ekki eina keppni í fyrra sem er algjörlega óásættanlegt hjá Ferrari. Menn í heimahögunum eru búnir að fá nóg þannig að ég treysti á þá,“ segir Rúnar sem sér rauðklæddan ökuþór fagna í haust.

„Þetta gæti fallið bæði fyrir Sebastian Vettel og Räikkönen. Ég spái ökumanni Ferrari sigri en menn þurfa að passa sig á Hamilton. Hann tapaði titlinum til Rosbergs í fyrra og er staðráðinn í að endurheimta hann. Hamilton var svakalega ósáttur þannig að það er allt undir hjá honum og Ferrari-mönnum,“ segir Rúnar Jónsson.