Heimir: Það lið sem vanmetur Kósóvó fær það beint í andlitið

„Kósóvó er með gott lið og við höfum verið að segja fólki frá því en það trúði því svona mismikið,“ sagði brosmildur landsliðsþjálfari, Heimir Hallgrímsson, eftir sigurinn sæta í kvöld.

„Það sáu allir í þessum leik hversu gott lið þetta er. Hversu hratt þeir eru að búa til gott lið. Nýju mennirnir þeirra í dag höfðu mikil áhrif á leikinn. Við vorum í vandræðum með stóra framherjann þeirra. Það lið sem vanmetur þennan andstæðing mun það beint í andlitið.“

Heimir þurfti að breyta liðinu vegna meiðsla og leikbanna og kom svo á óvart með því að setja Jón Daða á bekkinn.

„Það voru ýmsar ástæður fyrir þessu. Í fyrsta lagi ætluðum við að fara mjög framarlega og pressa á þá. Við vildum vera með tvo framherja sem eru grimmir í teignum og geta slúttað. Við vonuðumst til að halda þeim í varnarstöðu en það spilaðist akkúrat öfugt. Þeir byrjuðu af meiri krafti en við og fyrra mark okkar kom gegn gangi leiksins. Svo náðum við aðeins tökum á þessu,“ sagði landsliðsþjálfarinn og sagði að leikurinn hefði ekki spilast eins og þeir vildu en plan B að verjast vel hefði gengið upp.

„Hluti af leikplani var að hafa Emil á kantinum og hann átti svo að vera sem þriðji miðjumaður og koma inn. Það er ekkert ólíkt því sem hann er að spila.“

Oft spilað betri sóknarleik

Þjálfarinn viðurkennir fúslega að leikurinn hafi ekki spilast eins og hann vonaðist til.

„Við höfum oft spilað betri sóknarleik en í dag en ástæðan var sú að þeir pressuðu okkur framarlega og voru grimmir. Við fengum lítinn tíma á boltann og það sást aðeins að sumir eru ekki í leikformi hjá okkur. Við vorum að gera svolítið af mistökum með boltann. Á móti kemur að við fengum lítið af opnum færum á okkur þó svo þeir hefðu náð fleiri fyrirgjöfum en ég hefði viljað sjá. Við opnuðum okkur aldrei,“ segir Heimir en Gylfi var lykilmaðurinn hjá Íslandi. Hversu mikilvægur er hann fyrir liðið?

„Hann er sá leikmaður sem sóknarleikurinn snýst í kringum. Við þreytumst ekkert á að segja að þó svo hann sé okkar þekktasti leikmaður að þá er hann líka sá vinnusamasti á vellinum. Þegar þú ert með svona fyrirmyndir þá drífur það allt liðið með. Við erum með fullt af svona leiðtogum sem eru að leiða hópinn með góðu fordæmi.“

Allt önnur staða ef við hefðum ekki unnið

Heimir talaði mikið í aðdraganda leiksins um hversu mikilvægur þessi leikur væri upp á framhaldið.

„Við getum horft á stöðuna ef við hefðum ekki fengið þrjú stig hérna í dag. Þá værum við í fjórða sæti í riðlinum. Nú eigum við heimaleik gegn Króatíu og erum

búnir að búa til geggjaðan leik um efsta sætið í riðlinum með þessum sigri. Það er allt önnur staða. Nú kemur löng pása og vonandi fá þeir sem eru svolítið ryðgaðir meiri spiltíma hjá sínum liðum og við getum aðeins safnað liði. Vonandi getum við unnið Króata á heimavelli og það er það sem við erum byrjaðir að undirbúa núna,“ segir Heimir en honum er eðlilega létt.

„Auðvitað er mér létt. Við vissum hvað þetta er gott lið og ég held að allir sjái núna hversu gott lið þetta er núna.“