Tvær rútur fóru útaf á Kjalarnesi

Tvær rútur höfnuðu utan vegar á Kjalarnesi á tíunda tímanum í morgun. Björgunaraðilar vinna nú að því að því að koma farþegunum til aðstoðar en þeir verða fluttir í fjöldahjálparmiðstöð sem Rauði krossinn hefur opnað á Kjalarnesi.

Ekki er vitað til þess að slys hafi orðið á fólki en afar slæmt veður er á svæðinu og hefur veginum verið lokað af þeim sökum. Samkvæmt upplýsingum frá slökkviliðinu eru rúturnar fastar en vinna er í fullum gangi. Líklega þarf fólkið að bíða veðrið af sér í fjöldahjálparmiðstöðinni.