Erlent

Svíar svara „ónákvæmum upplýsingum“ um ástandið í Svíþjóð

Samúel Karl Ólason skrifar
Yfirvöld í Svíþjóð virðast þreytt á ónákvæmum upplýsingum um landið og hið meinta ástand þar varðandi innflytjendur og glæpi. Þau segja röngum upplýsingum um landið hafa verið dreift ítrekað að undanförnu og hafa ákveðið að svara þeim.

Aðdragandi þessara vendinga er að á kosningafundi um síðustu helgi virtist Donald Trump, forseti Bandaríkjanna, vísa til hryðjuverkaárásar í Svíþjóð sem átti sér aldrei stað. „Sjáið hvað er að gerast í Svíþjóð í gær,“ sagði hann.

Trump útskýrði mál sitt svo frekar og sagðist hafa verið að vísa til umfjöllunar Fox News um hið meinta ástand í Svíþjóð og hvernig innflytjendur væru valdur að gífurlegri fjölgun nauðgana, hærri glæpatíðni og öðrum samfélagslegum vandamálum.

Þegar fjölmiðlar fóru svo yfir opinberar tölur og staðreyndir og bentu á að það væri margt rangt í umfjöllun Fox sagði Trump fjölmiðla vera að ljúga um ástandið í Svíþjóð.

Utanríkisráðuneyti Svíþjóðar hefur nú kannað sannleiksgildi nokkurra staðhæfinga um landið.

Fjölgun innflytjenda leiði ekki til fleiri glæpa

Varðandi þá staðhæfingu að gífurleg aukning hafi verið á ofbeldisverknuðum þar sem byssum er beitt segir ráðuneytið að dregið hafi úr ofbeldi í landinu á síðustu 20 árum. Hins vegar hafi kannanir ítrekað sýnt fram á að íbúar landsins og annarra vesturlanda skynji að ofbeldisverknaðir hafi færst í aukana með fjölgun flóttamanna.

Þrátt fyrir það sýni rannsóknir fram á að fjölgun innflytjenda leiði ekki til aukinnar glæpatíðni.

Gögn sýni að síðustu 25 ár hafi morðum farið fækkandi. Hins vegar hafi sú tíðni tekið stökk árið 2015 og voru 112 morð framin það ár.

Sama er uppi á teningnum varðandi morð með skotvopnum. Árið 2011 voru 17 morð framin með skotvopnum en þau voru 33 árið 2015. Sú þróun er þó sögð tengjast aukinni hörku í átökum glæpagengja í Svíþjóð.

Skráðum nauðgunum hefur fjölgað

Því er gjarnan haldið fram að nauðgunum hafi fjölgað gífurlega samhliða fjölgun innflytjenda. Ráðuneytið segir rétt að skráðum nauðgunum hafi fjölgað. Hins vegar hafi skilgreining nauðgunar verið útvíkkuð verulega í Svíþjóð á undanförnum árum, sem geri samanburð við önnur ríki erfiðan.

Mikill munur sé á því hvaða verknaðir séu skilgreindir sem nauðgun á milli ríkja.

Sem dæmi nefnir ráðuneytið að ef sænsk kona segi eiginmann sinn hafa nauðgað sér á hverju kvöldi í eitt ár, sé það skráð sem 365 nauðganir. Í mörgum öðrum ríkjum væri það skráð sem ein nauðgun eða jafnvel ekki skráð.

„Vilji til að tilkynna slíka glæpi er mjög einnig mjög mismunandi á milli ríkja. Í samfélagi þar sem rætt er um slíka glæpi á opinskáan hátt og fórnarlömbum ekki kennt þar um, eru fleiri slík mál tilkynnt. Yfirvöld í Svíþjóð hafa ítrekað hvatt konur til að tilkynna öll brot.“

Yfirvöld hylmi yfir með flóttafólki

Því hefur einnig verið haldið fram að yfirvöld í Svíþjóð séu að hylma yfir þá staðreynd að flóttafólk sé að fremja glæpi.

Samkvæmt opinberum gögnum í Svíþjóð voru þrettán prósent allra Svía fórnarlömb í einhverskonar glæp árið 2015. Það er aukning á milli ára, en enn á sama stigi og það var árið 2005.

Þá bendir utanríkisráðuneytið á að rannsókn frá árinu 2005 og aðra rannsókn sem sýna að meirihluti þeirra sem voru sakaðir um glæpi áttu foreldra sem fæddust báðir í Svíþjóð. Samkvæmt þeim rannsóknum eru innflytjendur 2,5 sinnum líklegri til að vera grunaðir um að glæpi, frekar en fólk fætt í Svíþjóð sem á einnig foreldra sem eru fæddir þar.

Þá segir ráðuneytið að rannsóknir sýni einnig að það séu helst samfélags- og efnahagslegar aðstæður sem leiði til þess að fólk fremji glæpi. Eins og tekjur foreldra og hverfi sem fólk elst upp í.

„Ríkisstofnanir Svíþjóðar græða ekkert á því að hylma yfir tölfræði og staðreyndir. Þær sækjast eftir opnum samræðum sem byggja á staðreyndum. Svíþjóð er opið samfélag sem byggir á opnum aðgangi að opinberum skjölum. Það þýðir að almenningur, skólar og fjölmiðlar, geta nálgast upplýsingar um aðgerðir stjórnvalda.“

Svæði sem lögreglan fer ekki til

Því hefur einnig verið haldið fram að í Svíþjóð séu svæði sem lögreglan treysti sér ekki til að heimsækja. Ráðuneytið segir það ekki rétt, en þær fullyrðingar byggja á því að í febrúar 2016 byrti sænska lögreglan skýrslu þar sem bent var á 53 íbúðarsvæði, þar sem glæpatíðni var há og íbúar áttu við óöryggi og samfélagslegan óstöðugleika.

Þessi svæði hafa verið nefnd „no-go zones“. Ráðuneytið segir það að lögreglan treysti sér ekki til að fara þangað vera rangt. Hins vegar sé rétt að lögreglan hafi átt erfitt með að sinna störfum sínum á þeim svæðum, en landslög séu þrátt fyrir það ríkjandi.

„Vandamál þessarra svæða eru flókin og margþætt. Til þess að snúa þróuninni við þarf frumkvæði úr öllum stigum samfélagsins.“

Efnahagsvandræði landsins ýkt

Mikil fjölgun flóttafólks í Svíþjóð hefur verið sögð lenda illa á sænska ríkinu og það sé að hruni komið. Stjórnvöld þar segja þó að efnahagur landsins sé sterkur. Þrátt fyrir aukinn kostnað ríkisins vegna flóttafólks hafi ríkið skilað rekstrarafgangi árið 2015 og er talið að hann muni aukast fram til ársins 2020.

Þá hefur hagvöxtur Svíþjóðar verið með þeim hæstu í Evrópu á síðustu tveimur árum. Atvinnuleysi ungmenna hefur dregist verulega saman og hefur ekki verið lægri í þrettán ár og langtímaatvinnuleysi, eitt ár eða lengur, er það lægsta í öllu Evrópusambandinu.

Verulega hefur dregið úr hælisumsóknum í Svíþjóð, en ríkið segir að þörf sé á innflytjendum til að vega upp á móti því hve fæðingum hefur fækkað á undanförnum árum.

Múslimar eru lítill minnihluti

Utanríkisráðuneytið segir því gjarnan haldið fram að múslimar verði brátt meirihluti í Svíþjóð. Í raun er það langt frá raunveruleikanum og múslimar mæta verulegum fordómum.

Það er talið að nokkur hundruð þúsund íbúar í Svíþjóð komi frá ríkjum þar sem Islam er ríkjandi, en það segir ekkert til um hve margir eru trúaðir.

Samkvæmt opinberum tölum eru taka um 140 þúsund múslimar þátt í trúarstarfi í Svíþjóð, sem samsvarar um 1,5 prósenti af heildaríbúafjölda landsins. Af þeim tíu milljónum sem búa í landinu eru um 6,2 milljónir í sænsku þjóðkirkjunni.

„Fordómar og neikvæðni gagnvart múslimum er víða að finna í samfélaginu,“ segir ráðuneytið. Bent er á rannsókn frá árinu 2015 þar sem fram kom að múslimar í Svíþjóð eiga oft á tíðum erfiðara með að finna vinnu en aðrir, að þeir séu áreittir í skólum og á götum úti og jafnvel hótað og beittir ofbeldi.

Sænska ríkið birti einnig nokkrar staðreyndir um ástandið í Svíþjóð á Twitter í gær, þar sem hægt er að finna frekari upplýsingar.

Donald Trump

Tengdar fréttir

Bullað um Malmö í rússnesku sjónvarpsinnslagi

Í rússneska sjónvarpsþættinum Voskresnoje vremja kom fram að fimmtíu morð hafi verið framin í Malmö á síðasta ári. Ellefu morð voru í raun framin í borginni 2016.

Mest lesið


Fleiri fréttir

Sjá meira


×

Mest lesið