Áratuga reynsla skilar sér

A. Wendel ehf. var stofnað árið 1957 af Adolf Wendel og fagnar því 60 ára afmæli í ár. Fyrirtækið selur aðallega tæki til vinnslu og niðurlagningar á steypu og malbiki, búnað til snjóruðnings og hálkueyðingar á vegum.

Helstu vörumerki A. Wendel eru Ammann valtarar, jarðvegsþjöppur og malbiksstöðvar. Sömuleiðis Epoke salt-, sand- og pækildreifarar. Eins Överaasen snjóblásarar, kasttennur og flugvallabúnaður. Sömuleiðis Johnston Sweepers gatnahreinsibúnaður, Fjarås fjölplógar og sanddreifarar ásamt Nissen vinnustaðamerkingar. Þá hefur A. Wendel ehf. tekið við einkaumboði á Ísland fyrir Hilltip frá Finnlandi sem framleiðir búnað fyrir pickup bíla og minni vörubíla.

„Vöruúrvalið inniheldur meðal annars dreifara, snjótennur, pækildreifara, sópa og háþrýsti-þvottabúnað. Dreifararnir eru rafdrifnir og geta dreift salti, sandi, áburði og/eða vökva. Dreifararnir eru veghraðatengdir og geta því aukið eða minnkað magn eins og við á hverju sinni. Þeir eru jafnframt útbúnir fullkomnu stjórnborði sem búið er að íslenska,“ útskýrir Jón Wendel, framkvæmdastjóri fyrirtækisins

Snjótennur og fjölplógar eru raf/glussadrifnir og útbúnir með öryggis-skerum og fullkomnum stjórn- og ljósabúnaði. „Hilltip leggur að sögn Jóns ríka áherslu á að framleiða búnað sem hentar evrópskum og japönskum bílum. Hann segir Hilltip dreifara og snjótennur þegar hafa hlotið góðar móttökur hjá verktökum og opinberum aðilum hér á landi.

„Á haustmánuðum afhentum við talsvert af stórum salt- og sanddreifurum frá Epoke og fóru þessir dreifarar til verktaka bæði á landsbyggðinni og á höfuðborgarsvæðinu. Þessir dreifarar voru bæði í combi- og standard-útfærslum og nær allir með GPRS feril og aðgerðaskráningarbúnaði. Þá afhenti fyrirtækið nýjan Johnston 201C gatnasóp í nóvember síðastliðnum en hann er kominn í notkun í Hvalfjarðargöngum. Johnston Sweepers er einn stærsti gatnasópaframleiðandi í veröldinni og framleiðir eingöngu gatnasópa. Þeir eru frá 4-18 tonnum að þyngd og fer öll framleiðslan fram í Dorking í Bretlandi. Um áramótin fékk Framrás í Vík svo afhentan öflugan ASC 150 jarðvegsvaltara frá Ammann Group. Þá hefur verið talsverð sala í stórum 500 til 810 kílóa jarðvegsþjöppum frá Ammann en þær eru útbúnar 3ja-öxla rótorum sem gerir það að verkum að þær eru mun duglegri í ójöfnu undirlagi en aðrar þjöppur í sambærilegri þyngd,“ upplýsir Jón og bendir á að Ammann er með einkaleyfi á þessum búnaði.

Starfsmenn A. Wendels búa að sögn Jóns yfir áratugalangri reynslu og sérþekkingu og er lögð rík áhersla á að veita viðskiptavinum skjóta og góða þjónustu. Allar nánari upplýsingar er að finna á wendel.is