Áttu „vinsamlegt“ símtal en deila enn

Donald Trump og Enrique Pena Nieto, forsetar Bandaríkjanna og Mexíkó, töluðu saman í síma í gær um vegginn margumrædda sem hefur valdið deilum á milli landanna tveggja. Nieto ákvað á fimmtudaginn að hætta við ferð sína til Bandaríkjanna þar sem hann átti að funda með Trump.

Trump ætlar sér að byggja vegg á landamærum ríkjanna og þvinga yfirvöld í Mexíkó til að borga fyrir byggingu veggsins. Mexíkóar eru reiðir vegna ætlana Trump og áróðri hans.

Veggurinn er eitt helsta kosningaloforð Trump en hann hefur ítrekað haldið því fram að hann muni þvinga Mexíkó til að borga fyrir vegginn. Talið er að verkið muni kosta um fjórtán milljarða dala, sem samsvara um 1.582 milljörðum króna. Landamæri ríkjanna eru rúmlega þrjú þúsund kílómetra löng.

Samkvæmt fréttaveitu Reuters sendur ríkisstjórnir bæði Mexíkó og Bandaríkjanna frá sér yfirlýsingar eftir símafundinn, þar sem báðir sögðust átta sig á því að þeir væru ósammála hvorum öðrum. Þeir hefðu hins vegar sammælst um að reyna að finna lausn á deilunni.

Þá segir í yfirlýsingu Mexíkó að forsetarnir hafi samþykkt að ræða greiðslu veggsins ekki opinberlega í bili. Hvíta húsið hefur hins vegar ekki staðfest að Trump hafi samþykkt slíkt.

Trump hefur ítrekað sagt að Mexíkó komi betur undan samningum ríkjanna eins og fríverslunarsamningi Norður-Ameríku og að Mexíkó hafi látið Bandaríkin líta út „eins og kjána“.

Um 80 prósent af öllum útflutningsvörum Mexíkó fer til Bandaríkjanna og um helmingur utanaðkomandi fjárfestingar í Mexíkó á síðustu tveimur áratugum hefur komið frá Bandaríkjunum.

Hér að neðan má sjá frétt frá því fyrr í vikunni, þar sem Trump segir að bygging veggsins muni hefjast á „næstu mánuðum“.