Íslenska karlalandsliðið maður ársins á Bylgjunni: „Lið eru hætt að vanmeta Ísland“

Landsliðshópur Íslands á Evrópumótinu í Frakklandi í sumar er maður ársins að mati hlustenda Bylgjunnar og lesenda Vísis en tilkynnt var um niðurstöðuna í útvarpsþættinum Reykjavík árdegis á Bylgjunni í morgun.

Strákarnir okkar unnu eins og frægt er orðið hug og hjörtu þjóðarinnar með framgöngu sinni í Frakklandi.

Hæst bar sigurinn á Englendingum í sextán liða úrslitum en liðið hefur farið vel af stað í undankeppninni fyrir heimsmeistaramótið í Rússlandi 2018 og eru til alls líklegir.​

„Takk fyrir þetta. Tilfinningin er góð en það er hópurinn sem er að fá þessa útnefningu. Það er gaman að hafa verið hluti af þessu,“ sagði Heimir í samtali við Bylgjuna í dag en viðtalið má heyra í spilaranum hér fyrir ofan.

Ísland er með sjö stig af tólf mögulegum í fyrstu undankeppni liðsins eftir ævintýrið í Frakklandi.

„Við vissum að það yrði erfitt að endurræsa allar vélar eftir EM-ævintýrið. Sérstaklegar þar sem kröfurnar eru meiri og andstæðingarnir leika öðruvísi gegn okkur. Lið eru hætt að vanmeta Ísland. Vonandi er það orðin regla að Ísland taki þátt í stórmótum.“

Var í hálfgerðri liðveislu hjá Lars í byrjunHeimir fór fögrum orðum um Lars Lagerback er hann var spurður út í hvaða lærdóm hann hefði dregið af Svíanum.

„Eins og ég hef oft sagt var ég í hálfgerðri liðveislu hjá honum og reyndi að læra eins mikið og ég gat. Hann er höfuðið á bak við þetta allt saman og við reynum að halda því áfram en heiðurinn liggur einnig hjá þjálfurum landsins sem komu þessum drengjum upp.“

Landsliðið var einnig valið lið ársins af Samtökum íþróttafréttamanna á dögunum en Gylfi var valinn íþróttamaður ársins.

„Maður sér hversu mikið þetta gaf þjóðinni í sumar að við gátum sameinað þjóðina þegar við vorum í Frakklandi. Það voru allir vinir í tvo mánuði í stað þess að þrasa um pólitík,“ sagði Heimir léttur en viðtalið má heyra í spilaranum hér fyrir ofan.