Koss dauðans að vinna Íslandsmeistara KR í vetur

Hversu gott er fyrir liðin í Domino’s deild karla að vinna KR? Stjarnan ætlar að reyna að bætast í hópinn í kvöld en örlög liðanna sem hafa unnið KR í vetur hafa verið grimm.

KR-ingar eru á toppi Domino’s deildar karla, með reyndar jafnmörg stig og Stjarnan og Tindastóll en ofar í innbyrðisviðureignum. KR-liðið hefur unnið alla leiki á móti efstu liðunum en töpin tvö komu á móti liðum sem eru núna í 8. (Þór Þorl.) og 11. sæti (Njarðvík) deildarinnar.

Báðum leikjunum töpuðu KR-ingar illa (með samtals 24 stigum) þar sem liðið skoraði aðeins 68 stig að meðaltali. Frábær frammistaða hjá Þorlákshafnar-Þórsurum og Njarðvíkingum í þessum leikjum sínum í DHL-höll þeirra KR-inga keyrði allar væntingar í báðum félögum líklega upp úr öll valdi. Í stað þess að byggja ofan á tvo af óvæntustu sigrum tímabilsins hefur það komið í ljós að það er koss dauðans að vinna KR í vetur.

Þór eða Njarðvík hafa ekki unnið deildarleik síðan þau unnu KR. Allir sjö leikirnir liðanna hafa tapast og nú eru þau bæði komin í hóp neðstu liðanna í deildinni.

Þórsarar unnu KR 4. nóvember en hafa síðan spilað fimm deildarleiki og tapað þeim öllum. Síðustu þremur leikjum hefur Þórsliðið þó bara tapað með samtals 7 stigum.

Njarðvíkingar unnu KR 24. nóvember og voru þá að vinna í Vesturbænum í fyrsta sinn síðan 2006. Þeir ákváðu að semja ekki við Stefan Bonneau í framhaldinu en Bonneau var grenilega ekki vandamálið. Njarðvíkingar hafa síðan mætt liðum sem voru neðar en þeir í töflunni fyrir viðkomandi leiki en tapað þeim báðum með sannfærandi hætti.

KR heimsækir Stjörnuna í Garðabæinn í kvöld í toppslag Domino’s-deildar karla. Stjörnumenn stefna að sjálfsögðu á sigur þrátt fyrir örlög fyrrnefndra liða en sigur í kvöld þýðir að Stjörnuliðið verður búið að fagna sigri í þremur deildarleikjum í röð á móti KR. Stjarnan hefur unnið tvo leiki i röð á móti KR undir stjórn Hrafns Kristjánssonar, fyrrverandi þjálfara KR.

Hvort Stjarnan bætist í hóp KR-bana kemur í ljós í Ásgarði í kvöld en það er í það minnsta ljóst að annaðhvort Þór eða Njarðvík fagna langþráðum sigri. Það er öruggt af því að liðin mætast í Ljónagryfjunni í Njarðvík í kvöld.