Duttu hressilega í það við tökur á Rogue One á Íslandi

„Minn skemmtilegasti dagur var þegar ég vann með Mads á Íslandi,“ segir leikarinn Ben Mendelsohn um tökurnar á Rogue One: A Star Wars Story á Íslandi árið 2015. Mendelsohn leikur Orson Krennic í myndinni en hann og danski leikarinn Mads Mikkelsen, sem leikur Galen Erson, ræddu það í viðtali á dögunum hvernig það var að vera við tökur á myndinni á Íslandi.

„Við höfðum ekki hist áður en áður en eftir skamma stund vorum við farnir að syngja og dansa saman. Síðan duttum við í það,“ segir Mendelsohn um sig og Mikkelsen en báðir segja þeir minningarnar frá þeirri drykkju vera þokukenndar.

„Ísland hentar dásamlega fyrir söng og dans, eins og Íslendingar sjálfsagt vita. Þeir eru afar stoltir af því hvað þarf til að komast af við svona erfiðar aðstæður. Ánægjan af kvikmyndagerð er meðal annars sú að maður fær að fara á svona staði og og lifa eins og maður sé þaðan. Við ákváðum því að drekka hraustlega í okkur íslenska menningu,“ segir Mendelsohn.

Rogue One fjallar um sveit uppreisnarmanna sem stelur teikningunum að Helstirninu og gerist þar með áður en söguþráður New Hope byrjar og eftir Revenge of the Sith. Myndin verður frumsýnd hér á landi á morgun.