Hlynur og Tyson-Thomas best í fyrri hluta Domino´s-deildanna

Hlynur Bæringsson, leikmaður Stjörnunnar, var kjörinn besti leikmaður fyri ellefu umferða Domino´s-deildar karla í körfubolta og Carmen Tyson-Thomas, leikmaður Njarðvíkur, fékk sömu verðlaun í kvennadeildinni.

Uppgjör fyrri hluta deildanna fór fram í jólaþætti Körfuboltakvölds á Stöð 2 Sport í kvöld en KKÍ og Stöð 2 Sport eru komin í samstarf um verðlaunin.

Hlynur var einnig besti varnarmaðurinn hjá körlunum og átti sæti í úrvalsliðinu. Þórir Guðmundur Þorbjarnarson úr KR fékk verðlaun fyrir að vera besti ungi leikmaður fyrri hlutans.

Þá var Finnur Jónsson, þjálfari nýliða Skallagríms, kjörinn besti þjálfarinn en sérstök valnefnd greiddi atkvæði bæði í karla- og kvennaflokki. Skallagrímur hefur komið skemmtilega á óvart og er með tíu stig eftir ellefu umferðir.

Hin bráðefnilega Emelía Ósk Gunnarsdóttir, leikmaður Keflavíkur, var kjörin besti ungi leikmaðurinn í Domino´s-deild kvenna og þá var hún einnig kjörin besti varnarmaðurinn. Keflavíkurliðið hefur spilað frábærlega á leiktíðinni en þetta unga og skemmtilega lið er á toppnum í deildinni. Þjálfari hennar, Sverrir Þór Sverrisson, var kjörinn besti þjálfarinn.

Emelía á sæti í úrvalsliðinu ásamt samherja sínum Thelmu Dís Ágústsdóttur og Tyson-Thomas en auk þeirra eru í liðinu Sigrún Sjöfn Ámundadóttir, Skallagrími, og Ragna Margrét Brynjarsdóttir, miðherji Stjörnunnar.

Tveir leikmenn Tindastóls, sem er á toppnum í Domino´s-deild karla, eru í úrvalsliðinu en það eru Pétur Rúnar Birgisson og Chris Caird. Auk þeirra og Hlyns eru í liðinu Brynjar Þór Björnsson úr KR og Amin Steven, miðherji Keflavíkur.

Verðlaunin fyrir fyrri hluta Domino´s-deildar karla:

Domino´s-deild karla:

Besti leikmaður: Hlynur Bæringsson, Stjörnunni

Besti ungi leikmaður: Þórir Guðmundur Þorbjarnason, KR

Besti varnarmaður: Hlynur Bæringsson, Stjörnunni

Besti þjálfarinn: Finnur Jónsson, Skallagrími

Úrvalsliðið:

Pétur Rúnar Birgisson, Tindastóli

Brynjar Þór Björnsson, KR

Chris Caird, Tindastóli

Hlynur Bæringsson, Stjörnunni

Amin Stevens, Keflavík

Domino´s-deild kvenna:

Besti leikmaður: Carmen-Tyson Thomas, Njarðvík

Besti ungi leikmaður: Emelía Ósk Gunnarsdóttir, Keflavík

Besti varnarmaður: Emelía Ósk Gunnarsdóttir, Keflavík

Besti þjálfarinn: Sverrir Þór Sverrisson, Keflavík

Úrvalsliðið:

Emelía Ósk Gunnarsdóttir, Keflavík

Carmen Tyson-Thomas, Njarðvík

Thelma Dís Ágústsdóttir, Keflavík

Sigrún Sjöfn Ámundadóttir, Skallagrími

Ragna Margrét Brynjarsdóttir, Stjörnunni