Yfir 1.300 uppsagnir hjá Lloyds

Breski bankinn Lloyds Banking Group hefur tilkynnt um niðurskurð 1.340 starfa, en á sama tíma verður 110 nýjum störfum bætt við. Því verður skorið niður um 1.230 störf samtals.

Cityam greinir frá því að niðurskurðurinn sé liður í 9.000 starfa niðurskurði sem tilkynnt var um árið 2014. Í júlí á þessu ári var greint frá því að 3.000 störf til viðbótar yrðu lögð niður fyrir árið 2017.

Niðurskurðurinn verður meðal annars í útibúum, vöruþróun og markaðssetningu fyrir viðskiptavini og í viðskiptabankastarfsemi.

Eins og Vísir hefur greint frá hefur verið mikið um niðurskurð í bönkum Evrópu og Bandaríkjanna á síðustu misserum, meðal annars í Deutsche Bank og í Commerz Bank. En einnig hér á landi, til að mynda hjá Arion banka.