Sigurður Ingi með meirihluta þingflokks að baki sér

Sigurður Ingi Jóhannsson forsætisráðherra nýtur að öllum líkindum stuðnings meirihluta þingmanna Framsóknarflokksins til að gegna formennsku í flokknum. Sigmundur Davíð Gunnlaugsson virðist eiga á brattan að sækja í baráttu hans fyrir að halda formannssætinu í flokknum.

Mikið er þrýst á Sigurð Inga Jóhannsson forsætisráðherra að bjóða sig fram til formennsku. Á miðstjórnarfundi flokksins á laugardag var staðfestur klofningur í flokknum milli stuðningsmanna Sigmundar Davíðs og Sigurðar Inga.

Samkvæmt áræðanlegum heimildum fréttastofu eru allar líkur á að Sigurður Ingi njóti meirihlutafylgis í þingflokknum þótt formaðurinn eigi sér þar dygga stuðningsmenn. Þeirra á meðal eru Ásmundur Einar Daðason og Vigdís Hauksdóttir sem bæði ætla að hætta á þingi í haust og Gunnar Bragi Sveinsson sem mun leiða flokkinn í Norðvesturkjördæmi.

Þrjú í framboði gegn formanninum

Á laugardag fer fram tvöfalt kjördæmaþing Framsóknarflokksins í Norðausturkjördæmi, kjördæmi Sigmundar Davíðs. Þar er uppi sú óvenjulega staða að þrír sitjandi þingmenn sækjast einnig eftir forystusætinu. Höskuldur Þórhallsson vill fyrsta sætið, Þórunn Egilsdóttir býður sig fram í fyrsta og annað sæti og  Líneik Anna Sævarsdóttir sækist eftir fyrsta til þriðja sætinu.

Nái ekkert þeirra yfir helmingi atkvæða í fyrsta sætið verður kosið á milli tveggja efstu frambjóðendanna í það sæti. Sigurður Ingi hefur verið í opinberri heimsókn í Danmörku frá því á sunnudag en kemur til landsins í dag. Hann hefur ekki lýst eindregnum stuðningi við Sigmund Davíð til áframhaldandi formennsku en hefur að undanförnu gefið því undir fótinn að hann kunni að bjóða sig fram.

Flokksþing Framsóknar hefst eftir átján daga þar sem forysta flokksins verður kosin. Sigurður Ingi sagði á miðstjórnarfundinum að hann gæti ekki boðið sig aftur fram til varaformanns með óbreyttri stjórn flokksins en heimildarmenn telja líklegt að hann bíði framyfir prófkjör í kjördæmi Sigmundar Davíðs, áður en hann ákveður hvort hann taki slaginn við formanninn.

Anna Sigurlaug ósátt með Guðna

Eiginkona formannsins segir að fyrrverandi formaður Framsóknar hafi sett ný viðmið með því að fara í sitjandi formann sem hann hefði áður sagt að ekki tíðkaðist innan Framsóknarflokksins. 

Anna Sigurlaug Pálsdóttir eiginkona Sigmundar Davíðs Gunnlaugssonar formanns Framsóknarflokksins segir á Facebook síðu sinni í dag að Guðni Ágústsson hafi frá fyrstu dögum þeirra hjóna í hringiðu stjórnmálanna deilt með þeim sögum og vel meintum heilræðum. Ef hana misminni ekki hafi það verið Guðni sem hafi sagt að innan Framsóknarflokksins gilti það heiðursmannasamkomulag að fyrrverandi formenn færu aldrei í sitjandi formann.

Nýtt fordæmi hafi nú verið sett í þessum efnum og vísar Anna Sigurlaug þar til ummæla Guðna í Fréttablaðinu í dag. En þar segir hann að Framsóknarflokkurinn vilji geta lagt verk sín í dóm kjósenda en nú finni hann að menn óttist að þau vondu mál sem Sigmundur Davíð hafi orðið fyrir yfirskyggi kosningabaráttuna og skaði árangur flokksins í komandi kosningum.