Gautasynir ríða á vaðið í brelluskotskeppni Meistaradeildarinnar

Daði Laxdal Gautason og bróðir hans Aron Gauti Laxdal Gautason ríða á vaðið í brelluskotskeppni Meistaradeildarinnar sem fór af stað í gær.

Þessir hæfileikaríku bræður unnu sláarkeppni Meistaradeildarinnar á síðustu leiktíð með yfirburðum þegar þeir hreinlega tóku keppnina upp á næsta þrep eins og Vísir fjallaði um.

Daði og Aron Gauti fengu að launum ferð á úrslitahelgi Meistaradeildarinnar og hafa nú verið fengnir til að keyra nýju brelluskotskeppnina í gang. Hún ber heitið Trick Shot Showdown en kassamerkið fyrir hana er #selecttrickshot.

Allir mega senda inn myndbönd með kassamerkinu en sigurvegararnir fá að launum dag í höfuðstöðvum boltaframleiðandans Select í Danmörku. Þar munu sigurvegararnir taka upp brelluskotsmyndband með tveimur atvinnumönnum sem keppa í Meistaradeildinni.

Aron og Daði eru búnir að setja viðmiðið í keppninni ansi hátt með þessu fyrsta myndbandi en við aðra sem ætla að spreyta segjum við bara: Gerið ykkar besta.

Þessi ótrúlegu skot Gautasona má sjá í spilaranum hér að ofan.