Nýbúin með skírnarkjóla

Útgáfu bókarinnar Prjónað af fingrum fram eftir Kristínu  Schmidhauser Jónsdóttur verður fagnað á morgun klukkan 17 í Eymundsson á Skólavörðustíg. Hún er helguð fáguðu handverki og listsköpun Aðalbjargar Jónsdóttur sem er samofið lífshlaupi hennar og minningum, eins og segir í frétt frá útgáfunni Sæmundi.

Aðalbjörg er fædd í desember árið 1916 og verður því 100 ára rétt fyrir jól en hún er eins og ung stúlka þegar hún svarar í símann.

Spurð hvort hún sé enn að prjóna svarar hún: „Ja, ég lauk nýlega við tvo skírnarkjóla sem eru komnir til sona minna – og húfur með. Í þetta sinn prjónaði ég úr erlendu garni en þegar ég var að prjóna á börnin mín í gamla daga notaði ég mest íslenska ull, og auðvitað í kjólana líka sem fjallað er um í bókinni.“

 

Aðalbjörg kveðst hafa notað gömul mynstur í kjólana og breytt þeim eins og hana langaði til. „Ég hafði aldrei neina uppskrift, bara reiknaði það út í huganum hvernig ég vildi hafa kjólinn. Svo prjónaði ég kápur og fallega brúðarkjóla. Ég er afskaplega þakklát henni Kristínu fyrir hvað hún gerir þessu öllu góð skil í bókinni.“

 

Greinin birtist fyrst í Fréttablaðinu 7. september 2016.