Gleðitár og geðshræring þegar poppprinsinn mætti - Myndir

Það hefur varla farið fram hjá mörgum að poppstjarnan Justin Bieber er mættur til Íslands en hann mun halda tvenna tónleika hér á morgun og föstudag í Kórnum í Kópavogi.

Bieber er einn þekktasti tónlistarmaður í heimi og á stóran hóp aðdáenda hér á Íslandi. Nokkur fjöldi þeirra mætti á Reykjavíkurflugvöll í hádeginu til að taka á móti poppprinsinum en einkaþota Bieber lenti um klukkan 12.

Um hálftíma síðar kom Bieber sjálfur út úr vélinni og ætlaði þá allt um koll að keyra á flugvellinum þar sem aðdáendur hans öskruðu og grétu af gleði og geðshræringu.

Vilhelm Gunnarsson og Anton Brink ljósmyndarar Fréttablaðsins og Vísis voru á Reykjavíkurflugvelli í dag og náðu meðfylgjandi myndum. Þá var Vísir með beina útsendingu frá flugvellinum og má sjá hana í spilaranum hér að neðan.